袁嘉敏Bra辣插許穎

前港姐袁嘉敏為動畫聲演女主角，昨日她與同樣以「女主角」自居的模許穎踩落旺角正面交「峰」，上演怒火街頭！

前港姐袁嘉敏（Candy）繼日前出席配音動畫電影《神秘之法》首映時，寸爆許穎（Phoebe）配角扮主角後，昨日二人正面交「峰」宣傳。雖然氣溫驟降，但Candy仍穿上低胸裙，不吝嗇前後盡晒「阿嫲Bra」，她甫抵旺角鬧市即與男模合照，未有理會穿Tube Dress谷四吋事業線的Phoebe，即使被安排企埋合照亦顯得尷尬。直至訪問時再有火互窒，上演一場小學雞版「怒火街頭」！

對於Candy聲稱是女主角，「惹火」的Phoebe寸爆說：「Candy姐係大明星，我模嚟咋！」語畢Candy即反駁：「套戲兩個鐘，由頭到尾都係我把聲，中間有好短先係佢配！（見面好尷尬？）好尷尬，我覺得佢講錯嘢！」

句句有骨窒到應

Phoebe堅稱是電影公司指她聲演「女主角」，並說：「我又唔好意思喺度講多次我係主角，驚你又唔開心！但海報兩個角色都企好前！」Candy聞言着晒火：「未見過一套戲嘅『主角』得廿幾句對白，一個鐘配完都叫主角？莊思敏都有五十幾句啦。（好難再合作？）最好唔好！過咗世界末日冇事先算……冇事都唔好喇！」問到可覺得在上演鬧劇，二人即口啞啞，事隔數秒還突然「一條心」否認。

不過，Candy似乎怒火未消，活動後在微博暗諷Phoebe，表示前晚出席陳可辛派對後醉意未消，不料「有人」比她還醉，暗寸：「腦海只想起那句：『醒少少啦！』但沒說出口……自己今日穿了一個Chantelle Bra都過千元，比人家穿在外面的裙子還要考究精緻，大家層次不同！」火藥味甚濃！