學友激罕醉步賀陳可辛

張學友、金城武、古天樂、張家輝、甄子丹與梁家輝等歌影壇重量級紅星，前晚齊集中環為導演陳可辛賀壽，卡士勁過金像獎！歌神影帝輪住上台高歌，最「神奇」竟是曾志偉冇醉，反而學友鮮有地醉步離場！

導演陳可辛（Peter）前日50歲生日，由於歲數轉冧巴（由四字頭變五字頭），太太吳君如花六位數於中環某餐廳搞生日派對，甄子丹、古天樂、金城武、曾志偉、梁家輝、張家輝、張學友、邱淑貞夫婦、劉偉強、昔日女神柏安妮等共八十位朋友到賀，連許晉亨亦撐住拐杖與太太李嘉欣到賀！派對上，嘉賓玩得痛快，各人輪住上台獻唱，張家輝更搞笑地在學友面前扮學友，笑爆全場！甄子丹則彈琴伴奏，主人家陳可辛夫婦亦即席高歌。

切蛋糕時，陳可辛向君如深情送「肉嘴」，感激太太捱通宵為他籌備生日會，女兒陳是知則彈琴獻父，君如篤爆丈夫見到女兒彈琴，即忍不住流淚：「佢好鍾意喊，好感性！仲第一次跪女人（女兒）添！佢當個女係女神，個女做少少嘢佢都即刻撲出嚟，好似女王駕到咁！」而她對於老友葉玉卿將返港拍賀歲片「打對台」大表歡迎！

君如批准老公搵「金雞」

君如笑言為生日P花了不少心機，還幽默地說：「我特登叫多啲女嚟，全部中女好似曾華倩、李嘉欣咁，因為Peter有中年危機，所以批准佢做大丈夫搵金雞。（咁咪即係你？）都話人生過半百，睇開啲啦！」

前晚任司儀的曾志偉難得沒有飲醉，反而學友鮮有地帶着醉意離開，並需由其他人輕扶，腳步浮浮。而素來低調的邱淑貞（豆斗）早前被傳又有喜，她否認喜訊，其夫沈嘉偉面對鏡頭則依舊怕醜，不願上鏡。