阿Lam趙增熹搵仔Backup

林子祥和趙增熹將於明年舉行演唱會，兩人會大鬥音樂之餘，更計劃邀請兒子作後援「幫口」，所謂虎父無犬子，屆時兩對父子兵一同上陣對決，勢必掀起一番龍爭虎鬥！

歌手林子祥（阿Lam）和音樂人趙增熹相約於明年二月舉行演唱會，兩人昨日在舊冰室舉行《絕對熹祥A Mix & Match Concert with林子祥&趙增熹》記者會。為呈現Mix & Match的主題，兩人別出心裁地炮製鴛鴦，又分別送贈假鬍鬚及眼鏡予對方，實行即席變裝，大方任影！阿Lam更獲贊助商送上相機，並獲邀合作開攝影展，他笑說：「我要超越發哥！」

心情大好的阿Lam表示要將紅館的四面台搬到會展，不然坐最後一排的歌迷就只能「睇到粒豆」。而趙增熹笑言兩人開騷佬味濃：「今次樂手將會係清一色女將，費事得我哋兩個男人咁Dry啦！」

父子兵上台對決

除了大玩Mix & Match，兩人更打算以父子兵上陣作音樂對決，阿Lam表示兒子林德信已答應做嘉賓，而趙增熹則說：「我又呃又氹我個仔上台彈琴，但佢未應承！」問到趙增熹可打算開金口一同Jam歌？他搖頭說：「喺阿Lam隔籬唱我會好醜怪o架！」在旁的阿Lam打趣說：「我唔要同佢唱情情塔塔嘅歌，望住唱都唔會呀！」