石詠莉知衰剷相

前Freeze成員石詠莉日前上載「法庭照」到社交網站，被質疑有藐視法庭之嫌，昨日她表示歉意，以後都不會再於法庭拍照！

石詠莉（Sukie）上周五上載一張「法庭照」到其個人社交網站，留言道：「瘋狂抽中做高院的陪審員，可惜得我沒時間做喔……月底要在廣州跟歌迷見面，第一張唱片宣傳！」有讀者爆料指Sukie可能有藐視法庭之嫌！

Sukie昨日接受電話訪問時表示，早前收到法院候任陪審員的邀請信，並於指定日期到高等法院出席庭序：「嗰日我同其他市民一齊，當日有3個案件要抽籤，第一單案件已經抽中我做陪審員，因為要審15日，所以我同個法官講我係藝人，有啲工作已經簽咗約，所以做唔到！點知第二同第三單案都抽中，但兩單案都要審好長時間，所以我以同一理由再同法官申請豁免。」她還撒嬌說：「我仲畀個法官鬧，法官話我嚟得應該得閒o架嘛！」

對於上載照片被質疑藐視法庭，Sukie口窒窒說：「唔驚嘅！細路女唔識世界，知道唔啱已即刻刪除！」她指該「法庭照」於抽籤時所拍，但得知於法庭拍照較敏感，不會再於法庭拍照。而Sukie前晚仍照常與王宗堯出席活動。

審案庭不能拍照

黃國桐律師表示，在審案法庭裏絕不能拍照，法官會根據拍攝者動機考慮，就算貪玩都會以「藐視法庭」起訴，罰款1萬港元或入獄6個月：「如果相片披露到任何案情，則可判『妨礙司法公正』，視乎嚴重性判決！如果只喺法院內拍照，而不涉及任何案件，則不犯法！」而推卻擔任陪審員的原因，可以是健康理由、言語不通或特別職員，其他理由則由法官決定。