Phoebe全裸彩繪怕醜

胸模許穎昨日以人體彩繪宣傳動畫電影《神秘之法》，她自言是個十分敏感的人，所以最困難是要抵得搔癢！

向來行性感的許穎（Phoebe），昨日身穿比堅尼打底，並在身上塗滿彩繪，為動畫電影配音兼作人體彩繪宣傳，十分性感！她表示首次作人體彩繪，事前花了6小時「化妝」，甚花心機及時間。

提到最困難的地方，Phoebe不禁笑說：「我初頭都以為自己頂得住，不過原來一落筆就好痕，尤其一啲陰暗位置，好似大髀內側咁，所以我畫嘅時候都『哎唷』咁嘅聲，仲有胸口位因為有凹凸，所以都難畫！（點解唔全裸彩繪啫？）咁樣太痕喇！我個人比較敏感，而且都怕醜！」

自封女一 不屑做配

不過，其後Phoebe又表示全裸彩繪應留待出寫真賺錢，問到不怕屆時又被禁嗎？她說：「人體彩繪係藝術嚟o架！我唔擔心囉！就算要我以人體彩繪出鏡都唔介意o架！」另外，問到會否想似陳靜（DaDa）般角逐金馬女配角？她即酸溜溜說：「我依家已經係第一女主角啦！（你配音咋喎？）我係配女主角音，日本方面揀咗好耐，最後覺得我最適合囉！」