黃浩然讚乖阿佘封嘴

張慧雯涉嫌藏毒被捕，一眾藝人得悉此事後大表驚訝，其中一同拍攝新劇《師父‧明白了》的藝員黃翠如、黃浩然、麥長青、許亦妮及更張頴康都力撐她是一名乖乖女，希望她大步檻過！

黃翠如︰唔係呀嘛？我只見過佢一次，唔識佢，不過覺得佢好靚、好迷人，希望件事係誤會！（同佢有冇對手戲？）暫時都冇，之後唔清楚。（呢排有好多藝人吸毒嘅傳聞？）我成日覺得呢啲係傳聞，以為大家睇自己身邊朋友好健康，我連夜生活都冇，過嘅係阿婆生活。

黃浩然︰好突然！見過兩次、傾唔夠十句，不過佢幾有禮貌，冇特別異樣，喺我印象入面佢係一個乖乖女。（希望佢冇事？）當然希望！始終係同事，不過呢啲唔輪到我哋決定。（近期多藝人吸毒？）唔覺得淨係呢排特別多，不嬲都有。（引誘你？）未試過，我身邊人都知我係咩人，引誘我都冇用。

麥長青︰咁似拍戲啲劇情！（震驚？）我都呆一呆、醒一醒，雖然同佢唔熟，不過覺得佢好開朗，好活潑。其實藝人係公眾人物，應該時刻警惕自己，我連煙都唔食，酒都少飲，以身作則。

許亦妮︰有啲咁嘅事？之前出騷都見過佢，不過喺我心中佢係一個好Sweet、幾乖嘅女仔，我唔覺得係真，希望係誤會！（聽聞有圈中人吸毒？）實有！不過只係傳聞，唔知係咪真！

張頴康︰覺得佢好有禮貌，試造型見過佢，希望佢冇事！

佘詩曼：呢件事好難回應，都係交番畀警方處理好啲。（娛圈引誘多？）以我嚟講冇喎！我拍劇咁忙，又瘦成咁，再有人搞（引誘吸毒）會死o架！

朱咪咪：未合作過！藝人吸毒當然唔好，我以前有個親戚因為吸毒搞出好多問題，所以我對吸毒極之反感，飲酒都可以為開心，但吸毒係為咩呢？