香香苟姑娘聖誕搶錢

臨近年底，兩大女神岑麗香和苟芸慧分別出動搵真銀，雖然香香和苟姑娘慨嘆單身有點Dry，幸而有得吸金平衡心理，難怪香香說：「我驚拍拖會分心！」

下月就是聖誕節，兩大宅男女神岑麗香和苟芸慧伺機吸金，昨日更分別到商場出席活動。香香坦言因為劇集效應，近來接Job接到手軟，問到交稅是否好「甘」，她說：「以前都係住喺加拿大，今年第一次喺香港交稅，都有心理準備！」又揚言並不怕過寂寞聖誕，她說：「下個月好忙，月頭就要為新劇《神槍狙擊手》做準備，月中就要入劇組，有好多人陪我過聖誕，都好開心！」問到是否想拍拖？她說：「好難講，唔係話唔想，但要畀心機事業先囉，我驚拍拖會分心！」談到過氣緋聞男友錢嘉樂奪金馬獎最佳動作設計，有否恭喜對方？香香說：「我同盈盈（湯盈盈）、嘉樂佢哋有個Group，已第一時間發短訊恭喜！」

登網絡女神No.1

另一女神苟芸慧，昨日亦出動與何傲兒和林穎彤（Bella）出席商場聖誕騷。雖然緋聞多多，但苟姑娘仍強調單身，她透露聖誕除了密密開工搵銀外，一於講金唔講心，亦會跟一班同性好友開P，即使冇拖拍亦不會Dry。大會即場頒權杖予苟姑娘賀她榮登網絡女神No.1，苟姑娘笑言被封女神是「夢想成真」。她又透露因的士司機唔識路累她遲到，故計劃買車：「之前一直唔敢揸，又唔識香港啲路，但依家要克服！」又強調買車要靠自己，做獨立自主的人。

此外，病倒失聲的何傲兒堅持獻唱，幸表現仍有板有眼，問到聖誕會否跟緋聞男友「翻版祖藍」Wilson度過？她笑言會約家人及朋友：「我同佢講唔怕畀人影就追我囉！如果有對象，我會畀蘇民峰師傅過吓目，但依家未有呀！」