煒哥煮場撚手屠「龍」

前亞姐陳煒（煒哥）嫁得好老公，多得其擁有入廚秘技，完全俘虜男人的胃！兒時便入廚向父親偷師的她雙手布滿灼傷「戰績」，可想而知其廚藝功力有多深厚，今次趣趣哋就教讀者降「龍」十八掌！

嫁為人妻的煒哥因老公常外出公幹，為了不想賦閒在家，索性復出幕前，最近更轉戰無綫，忙於拍劇搞到懶入廚冧老公。不過，好客的煒哥對着為食朋友就絕不吝嗇，早前適逢節日，憑個人之力花了三日時間，炮製一餐供20人享用的花膠、鵝掌、海參與鮑魚之豪門宴，她笑說：「嗰次玩遊戲節目贏咗啲鮑魚，咪整畀啲朋友食，浸花膠連炆都用咗三日！」

如此花工夫的美食，煒哥完全駕馭得來，閒時亦愛整芝士焗龍蝦作小吃，今次難得展示個人最強技藝，特別推介這款「小吃」。她還教授小秘技，只要在沾生粉落龍蝦件的過程中分量掌握得宜，入口便很鬆軟美味又不油膩。這個焗蝦過程中，煒哥稍稍用了一個多小時就完成，完成品可謂色香味美俱全！

入得廚房冇得「剩」

有見時下女生不肯入廚，煒哥寄語姊妹，指一門了得廚藝絕對可贏得男人心，那就不用擔心做「剩」女：「我嫁咗都成日學嘢，之前喺台灣好鍾意一個由國宴級御廚鄭衍基主持的嘅節目，佢崇尚『不添加烹調』，擅長將食材發揮原味，係我嘅偶像！（自己有幾分？）距離滿分仲有好遠啦！」

台灣隔住電視「拜師」

廚藝了得的陳煒其實沒有拜師學藝，全靠自小向父母偷師再加上心機鑽研而成。不過，她近期轉而跟偶像鄭衍基「學藝」，對方是一位在台灣相當有名的國宴級御廚，更有「創意料理達人」之稱，擅長將食材原味發揮得最好、最真一面，再加以愛心炮製，煮出不少愛心美食。煒哥在台灣時最愛收看他主持的飲食節目，還欣賞其侍母之孝心。

龍蝦點揀先靚？

入到海鮮檔，隻隻龍蝦都咁上下樣，究竟點分新鮮定粗貨？等阿煒哥話過你知，仲教埋你點處理煮龍蝦的最重要步驟－放尿！

揀蝦

其實天氣愈凍，龍蝦就會愈靚，所以冬天食本地龍蝦更加好味。

一斤半重適合兩人分量，太輕冇肉食！

話明海鮮，梗係游水先叫生猛，蝦殼亦要色澤鮮明，暗啞色就可免則免。

觸鬚、腳仔要完整無缺，否則鮮味有機會因而流失。

眼珠要靈敏，觸碰時要反應快，擺明超新鮮。

放尿

煮蝦時要先放尿，去除異味，否則煮出嚟一鑊「羶」味。

先用筷子插入中間尾掩位，龍蝦便會乖乖放尿！