江若琳想Date老闆開餐

忙於在內地工作的江若琳，相隔三年再推出專輯，心情靚爆的她在歌迷會上為歌迷獻唱之餘，更親手寫上聖誕卡，她透露新碟銷量理想，誓要請老闆何哲圖食大餐！

江若琳（Elanne）昨日出席歌迷會活動，現場有近百名粉絲撐場，身穿粉紅色花花短裙兼四吋黑皮長Boot的她甫出場即引起現場粉絲的瘋狂尖叫，Elanne唱出兩首新歌及大玩遊戲，更為遊戲勝出者親手寫聖誕卡，相信恨死不少粉絲！

談到老闆何哲圖（Herman）沒有現身撐場？Elanne說：「Herman佢本身話嚟o架！但頭先打電話畀我話感冒，把聲仲好『盟』添，不過佢都有鼓勵我。」問到新碟銷量理想，老闆可有獎賞？識做的Elanne說：「我要請大家食飯至真啦！不過個個都輪流病，好難齊腳呀！」提到臨近聖誕會如何慶祝？未出發先興奮的她表示要與朋友搞私人派對，盡興一番！

望有四台聯頒

至於有傳無綫有意再次拉攏其他電台舉行四台聯頒，Elanne大表支持：「都幾好嘅，咁個獎嘅公信力咪會大啲囉！」她又坦言將要「飛來飛去」，雖然可能會因此而缺席部分頒獎禮，但她說：「其實有得參與已經好好啦，有冇獎都唔緊要。」