千嬅Kelly獻囝囝第一次

天后級「龍媽」陳慧琳與楊千嬅，應好友谷祖琳邀請母子檔拍攝慈善月曆，兩位星級BB處男下海晒Cute樣，重廿多磅的「小龍包」手腳肥嘟嘟起晒(月展)，兩腳踏地爭做「B界大佬」；而Torres亦手瓜粗壯，更眼仔睩睩望鏡頭，非常精靈！

多位星級龍B今年排隊出生，同是龍媽之一兼思覺失調學會副主席谷祖琳（小谷），邀請圈中12位龍媽陳慧琳（Kelly）、楊千嬅、李樂詩、何嘉莉、趙頌茹、陳自瑤、文頌嫻、朱薰、楊思琦及姚嘉妮帶同BB拍攝「XOXO慈善月曆」，為香港思覺失調學會籌款，當中以Kelly的劉琛（小龍包）及千嬅的丁進諾（Torres）最矚目。兩位星媽平日不時將囝囝掛在口邊，今次為慈善母子檔上陣，格外有意義！

為善事力撐好友

「小龍包」與Torres處男下海，在影樓自然萬千寵愛，據知Torres甫到影樓即睡午覺，而「小龍包」則十分精神，看見小谷的囡囡劉心更肉緊地哄向她撩她玩，兩個龍B的名字巧合地讀音相同，似乎格外投緣！眾龍B中以「小龍包」最重磅，足足有廿多磅，只有幾個月大的他腳仔非常有力，只須Kelly從後輕扶已站得穩。至於細3個月的Torres亦精靈醒目，穿上橫間衣服的他雖然剛睡醒，但一埋位已叉足電，在影樓毫不怯場，靠着媽媽眼仔睩睩、肥手Fing Fing。

Kelly昨日接受電話訪問時表示，選擇白色母子裝是因為白色代表永恒，問到為何讓囝囝「處男下海」，她說：「因為小谷叫到，同埋為慈善。（咁快識企？）其實唔係企o架！只係嗰剎那，佢未識行。『小龍包』唔捱得，影嗰陣仲係中午瞓覺時間，要快快手拍完，唔係就瞓着o架喇！」而千嬅則表示將囝囝的第一次獻給慈善機構，是希望帶出關注情緒問題的訊息，她笑指囝囝盡得父母「真傳」，喜歡望鏡頭：「BB好乖，冇怯場，係影嗰陣有太多閃燈，所以有少少唔慣。之後見到小谷個女，佢哋排排坐，好得意！」

姚嘉妮剝光囝囝

不少參與拍攝的龍B都剝光豬，姚嘉妮笑言囝囝本來有着衫，後來愈除愈少。至於李樂詩亦不介意兩個月大的細仔全裸上鏡：「人啱啱出世都冇衫着，不過我嗰日化妝化咗一個鐘，個仔等到瞓着咗，要整醒佢。佢好乖冇瀨尿，佢試過請我『飲茶』o架！」小谷希望透過是次拍攝帶出從小保護思覺健康的訊息，整個過程花了4天，並邀得星級攝影師夏永康操刀。

Profile：劉琛（Riley）

Kelly今年3月21日為老公劉建浩誕下細仔劉琛（Riley)，綽號「小龍包」，出生時重6.5磅，至滿月時已有9磅重！Kelly特意趁「小龍包」滿月時，左擁大仔「蝦餃仔」劉昇、右抱「小龍包」合照，笑言享受一盅兩件之樂。

Profile：丁進諾（Torres）

千嬅與老公丁子高的囝囝丁進諾（Torres），又有「RMB」之稱，今年6月5日出世時重7.6磅，3個月後激增至16磅，絕對是一個「巨B」！Torres人仔細細已孖住老竇搵銀，在一個珠寶店廣告中大騷肥腳仔，丁子高更誇口囝囝似足他般靚仔！