吳雨霏唔當Kay勁敵

多個樂壇頒獎禮將於下月起陸續舉行，吳雨霏昨日出席代言活動時表示，從不與「宿敵」謝安琪比較，更誇口對自己的歌曲充滿信心，擺明向對方下戰書！

自謝安琪（Kay）與環球不歡而散後，一直有傳環球屬意吳雨霏（Kary）接棒做一姐，頻頻為她派歌力谷明年的演唱會，全力狙擊前「一姐」Kay！而多個樂壇頒獎禮將於下月起陸續殺到埋身，兩位新舊環球「一姐」將力爭女歌手獎，不過Kary昨日與前緋聞男友周柏豪出席adidas尖沙咀旗艦店重新開幕活動時，否認過檔是為了撼贏Kay，她說：「入環球唔係為爭獎，係要有進步同賺錢，我從來冇同Kay比較！過去一年，我派咗多首歌，對歌曲充滿信心！」信心十足的她，似向今年冇出碟的Kay下戰書！

周柏豪唔知酬勞

至於傳被叮出叱咤頒獎禮男歌手三甲的柏豪亦一於少理：「冇失望，入到阿媽排行榜就得！」此外，問到與Kary「情侶檔」上陣是否酬勞更豐厚，他表示不知情：「係咩？我唔知行規，從來唔會過問公司接活動係幾多錢！」