林峯騷後「收山」

林峯將於明年1月底舉行一連兩場紅館個唱，第四度踏足紅館的他宣布個唱後暫時「收山」！他揚言會在「告別」個唱上大玩新意思，使出渾身解數！

林峯昨日出席《瑞士依波路表矚目呈獻A Time 4 You林峯演唱會》記者會，獲無綫高層樂易玲、吳雨及Hit爆的「宅男女神」岑麗香（香香）等撐場。官仔骨骨的林峯與四位性感女模特兒出場，現場首播他與香香主演的微電影預告片。然而，即將第四度開紅館騷的林峯宣布要暫時「收山」，看來峯迷要好好把握這次機會，一睹紅館上的「峯」采！

談到「收山」，歌、影、視三棲的林峯坦言忙爆：「已經連續開咗四年個唱，嚟緊要趕住出碟，出年又要拍劇同拍電影，時間真係分配唔到！可能起碼要暫停一、兩年。」但他強調並非闊別樂壇：「雖然唔開騷，但拍戲之餘都會兼顧音樂工作，等我儲多啲歌，將來畀啲新元素大家！」問到為何在前晚的台慶大合照上「冇影」？他表示是安排出錯，惟有下次補拍。

傷腳香香撐場

現場見香香不時要人攙扶，她說：「台慶嗰晚喺後台跑步仆親呀，而且未睇醫生！」問到與林峯合作可有過電？香香笑說：「冇啦！我哋一早就識o架喇，自己會放多啲心機喺工作上！」