黃智賢0提名插冇公理

去年台慶頒獎禮最佳男配角黃智賢，於《雷霆掃毒》演出備受激讚，獲睇好今年冧莊，可惜在率先曝光的入圍名單中，他竟十強都不入，令向來好好先生的他扯火怒插無綫！

雖然《萬千星輝頒獎典禮》十強入圍名單今日較後時間才公布，但本報收到可靠消息，視帝大熱林峯、黎耀祥、鄭嘉穎、黃宗澤悉數入圍；視后依然是徐子珊與楊怡之爭。但盛傳極有機會與同樣贏盡民意的「蘇基」古明華、「彭三順」陳國邦問鼎最佳男配角的「潘Sir潘學禮」黃智賢（Ben），竟然十強不入，叫人一地眼鏡碎！其他入圍「有份」陪跑男配則有岳華、蔣志光和林子善等。

依過往慣例，今日公布的入圍名單會由去年得獎者揭曉，如今Ben慘成炮灰，勢令他內心不是味兒。記者昨日致電Ben，當知道冇份角逐任何獎項，Ben由寂靜變得鼓譟：「真係好詫異！失望當然有啦！我唔知準則係乜？今年一人一票講公道、講民意，依家我冇份入圍，真係唔知公道何在？如果潘學禮都唔入圍，公理何在？」

監製叫攞過唔好爭

愈說愈火的Ben更反問自己是否已升呢男主角：「如果唔入男配，咁我係咪男主角？曾經有監製講話我上年攞過，今年唔好爭！視帝都可以冧莊，點解男配角唔得？」他更狂插：「依家將我嘅機會白白攞走，連選都冇得選，機會都唔畀我！潘學禮呢個角色十強都唔入，我絕不相信！公道？！」《雷》劇監製林志華對Ben落選男配，同樣感失望：「好愕然同失望，本來諗住投佢一票，公司選十強嘅機制我都唔清楚，係咪大家覺得佢係主角而Miss咗男配角呢?其實佢係男主角，大家都睇到佢嘅努力。」

楊怡揚言有獎唔怕傷

同劇的子珊得悉Ben零提名，驚訝地說：「吓？無論點都好，Ben有份參與呢套劇，惟有一齊爭最佳劇集！（安慰佢？）咁大個人唔使，前輩嘛，佢明o架喇！」而昨日她與「死敵」楊怡出席活動，強調沒有不和：「今次係同楊怡傳爭視后後第一次合作，之後都有好多機會，冇所謂啦，搵錢啫！成日都有呢啲新聞（指惡性競爭），但我哋係良性，唔會影響工作，總之唔使咁執着，唔好畀咁大壓力我！」而楊怡對於前晚缺席台慶，她表示因右腳骨裂未康復，故在家中休息：「公司叫我唔好郁咁多，今日只係因為簽咗約先出嚟！」問會否擔心缺席台慶影響爭視后機會？她說：「唔會！」又強調即使「行唔到」，亦會出席下月頒獎禮：「呢個一定出席，如果有獎，趷都趷上台！」

祥仔贏獎收視百分百

至於曾冧莊視帝的黎耀祥，行運到腳趾尾，不只於台慶贏走一百萬獎金獎品，他得獎一刻收視率更達100%，高達36點，成為全晚之最，對此他說：「會請食飯，大家都戥我開心，可能係啲運氣一次儲埋畀我！」但強調奪視帝絕不靠運：「視帝唔講運氣，因為今年一人一票！」