子珊凌空晒一字馬

無綫昨晚舉行45周年台慶騷，可惜全晚驚喜欠奉，只有靠苟芸慧、岑麗香與高海寧三大女神及視后大熱徐子珊扮性感蜘蛛女「倒奶」吸收視。最搞笑的是關菊英拍手時拍甩贊助的近億元鑽飾，令她一度憂心忡忡！

為慶祝無綫45周年生日，全台藝人昨晚出席《萬千星輝賀台慶》，除了上屆視后胡杏兒因拍《衝上雲霄II》而身處英國外，陳豪、黎耀祥、郭晉安、鄭嘉穎、林峯及徐子珊等小生花旦都有撐場。不過，首Part表演已欠驚喜，由薛家燕與關菊英帶領後輩黃浩然、鍾嘉欣、謝天華、陳展鵬及黎國輝（阿感）大唱無綫經典主題曲，眾人更疑似咪嘴！為了增添氣氛，玩送大禮遊戲時，反串打扮的陳豪為免穿迷你裙的女友陳茵媺坐在椅上走光，醒目坐上女友大髀，直到遊戲完畢才起身，甜蜜到暈。

練舞搞到周身傷

論全晚亮點定必是一班女藝人大賣色相，除了苟芸慧、岑麗香與高海寧三大女神外，徐子珊、黃智雯與朱晨麗等在「女神愛上網」環節齊以性感上陣，清一色穿上低胸緊身衣兼露白滑玉背，在網上跳舞十足蜘蛛女！八人「安全措施」做到足，如何倒吊仍沒有走光。當中以徐子珊為爭視后最搏命，凌空做出一字馬兼倒吊360度轉來轉去，完全無懼腦充血，睇見都牙煙，她事後說：「做完大家喊咗出嚟，真係好緊張！因為只係練咗一個星期，周身瘀又傷，一直希望做好。今次安全完成都好滿意，真係好感動。」不過，論最搞笑則是關菊英佩戴千萬美元（約7,800萬港元）鑽飾賀台慶，可是在送大禮環節中拍手掌時太興奮，不慎令戒指上碎石「拍甩」，工作人員一度為她尋找失物！菊姐失鑽石後憂心忡忡，問到是否要賠償？她說：「未知，可能隻戒指太鬆。」幸好最後失而復得。

黎耀祥勇奪大獎

至於陳豪、黎耀祥、謝天華與郭晉安惡搞《名媛望族》的環節「星聲台慶劇」亦是亮點之一。扮楊怡的陳豪及扮江美儀的天華齊齊穿上黑色絲襪，但以「黑絲飛毛腿」的天華最惡頂，他更跳上陳百祥大髀上Un來Un去，令人笑破肚皮，事後陳豪說：「搞吓嘢啫！對絲襪都穿窿，對鞋係訂造！」他又笑言只是玩票性質，相信女友陳茵媺及楊怡不會介意。

今年台慶另一特點就是傷兵滿營，不只嬌滴滴的朱晨麗扭傷腰，連雄赳赳的猛男也在綵排時受傷。繼「巨聲幫」陳國峰拗柴外，沈震軒亦扭傷左膝舊患，有跳舞底的狄易達與大大隻的黃長興同在綵排「飛躍一廠大地」時受傷，搞到正式表演蝦碌連連。至於台慶大獎，黎耀祥行運行到腳趾尾，擲骰仔贏了梁嘉琪，奪得一百萬獎金連獎品，他說：「喺TVB咁耐都未贏過大獎！」