祖兒視阿詩永遠朋友

容祖兒與男友劉浩龍（師兄）同遊日韓，期間舊密友何韻詩「出櫃」，令她捲入「雙性戀」疑雲。情緒一度受影響的祖兒昨日本木無表情，唯獨提到男友才變得寬容，回復笑臉。

祖兒昨日在經理人霍汶希（Mani）為首的9人英皇大軍護駕下出席《粉紅高踭鞋慈善競跑比賽》，同場還有謝霆鋒及黃偉文。穿上師兄最愛的螢光綠現身的祖兒，談到與師兄外遊兜路返港時說：「太多記者喺機場，唔係咁鍾意，私人生活想低調。」她一輪嘴續說：「由今年中到今日，新聞未停止過，啲事傳來傳去好困擾，咁樣糾纏落去，我係咪應該再低調啲？我唔係好願意將私人生活公諸同好，同大家分享太多，呢個係我性格上嘅小小缺陷。」

坦言受困擾

Mani曾指祖兒得悉何韻詩以「好難答」回應其雙性戀傳聞後崩潰，昨日現場有Fans拉起富同志色彩的彩虹橫額，心情已平復的祖兒說：「冇，入行咁多年經歷咁多嘢，『崩潰』兩個字太嚴重，呢啲事係有困擾，令我好攰。（被質疑雙性戀唔開心？）冇！喺呢行裏面有好多誤解，我已經習慣，呢個問題微不足道，冇唔開心。感情問題最緊要有愛，感情係兩個人感受到就OK，我唔想同大家作無謂交代！」

撐好友「出櫃」

對於阿詩「出櫃」，祖兒大表支持，並以「阿菇」稱呼對方：「阿菇表達咗佢嘅取向，作為朋友嘅我絕對支持，呢個動作唔係為佢自己，係為呢群人爭取更多公平，如果畀我有呢個機會都去支持！（嬲阿詩？）梗唔會嬲！咁多年感情、友情，唔能夠三言兩語去講晒，呢個係我永遠嘅朋友。（佢唔敢提你個名？）君子之交唔使下下講到明，呢段感情有幾認受，大家心知，唔使交代咁多！」不過，她以淡如水的「君子之交」形容雙方關係，似將友情降級。

問到有否為最近的新聞哭過，她笑着說：「呢個唔講啦！最緊要做嘢開心。」問到師兄有否安慰，她即時冧晒：「呢啲唔講。（阿詩剛出碟，感覺被利用？）唔好過分胡亂猜測，我個人好簡單，複雜咁諗落去只會唔開心！」