賈曉晨E波露遭圍插

前度「宅男女神」賈曉晨（JJ）撻着打星樊少皇後，在網民心目中的形象由天堂跌落地獄，她前晚在新劇穿上性感褻衣晒三吋事業線，慘遭網民喪鬧「肥、雞仔聲、講嘢唔正」，與同劇的朱晨麗及「黑絲誘惑」江美儀，成為無綫搶收視的犧牲品。

賈曉晨（JJ）前晚穿黑色性感褻衣，在無綫劇《名媛望族》中，勁晒事業線，但昔日「女神」已今非昔比，網友勁彈「肥、雞仔聲、講嘢唔正」。JJ昨日由橫店返港，在電話中說：「啱啱落機，未睇播咗咩，我同導演研究過件褻衣會唔會太性感？導演話要突出角色性格，要出嚟有效果，我就順應佢要求。拍嗰時我肥，我依家有D Cup，肥嗰時E Cup以上，件褻衣個墊被我拆咗，唔拆會好誇張。（驚投訴？）電視尺度唔會太色情，依家效果幾好。（男友樊少皇點睇？）佢唔喺香港，冇睇到。（驚佢唔鍾意？）唔緊要，拍劇尺度有限。」JJ穿褻衣晒事業線被插，監製莊偉健說：「場戲好合理，要介紹佢為錢乜都做。」

無綫做乜事？

除JJ在《名媛望族》晒事業線外，同劇演啞女「季小茹」的林穎彤（Bella），前晚在處境劇《愛．回家》的預告片中，亦低胸亮相，露出兩吋事業線，立即引起網友在討論區議論，更將她與JJ相提並論：「『大面Bella』同JJ都露乳溝，今晚無綫做乜事？」

此外，《名》演員周志文昨日出席活動，他說：「JJ同江美儀，我揀江美儀，佢身材Keep得好、演技好，又好照顧我，內外兼備。（嫌棄JJ？）佢都係好多人心目中女神，各有千秋！」