亞生3D直播跪低

亞洲先生今晚激凸開波，早前還事先張揚以3D製作雀影橫飛，最後淪為吹水！亞視高層昨日表示因技術問題冇3D直播，難怪打對台的《街坊廚神》金剛冇有怕，還趾高氣揚說：「我哋夠有溫家偉，一個『含』（撼）廿個！」

無綫今年閹掉「香港先生」，令亞視的「亞洲先生」獨大，吸引天下型男參選。「亞生」為求搞噱頭，事先張揚玩3D直播，意味穿上三角褲的參賽者隨時「禾雀亂飛」。不過，亞視向來雷聲大雨點小，今次的3D直播又宣布告吹，捉字蝨計仔再得逞！

亞視高層葉家寶昨日聯同一班「亞生」、張文慈及顏子菲等出席拜神儀式，談到引頸以待的3D直播，葉家寶提前自我篤爆這個驚世騙局，指技術問題未能3D直播：「我哋決賽過程全以3D錄製，11月21先會喺3D網站播出3D版！」追問是否今晚決賽冇3D激凸？他說：「冇嘅！可能要到亞姐決賽嗰晚先做到即時3D！」他又表示除了評判外，觀眾可在今日中午十二時到網站登記，票選心目中的「亞生」冠軍。問會否擔心網站癱瘓？他說：「要登記先可以投票，相信冇問題，若發現有異象就會即時截票！」至於名模Jessica C.與Ana R.會擔任小組評判。

大敵當前，無綫以《街坊廚神食四方》打對台，獲重用的金剛前晚出席該節目宣傳活動時心情High爆，當與關婉珊及梁麗瑩玩拆手撕雞、兩人幫他戴手套時，他即講有味笑話：「幫我戴套！」對於被公司委以重任對撼亞生，他即招積地說：「我哋都有靚仔靚女，我哋一個溫家偉，一個『含』（撼）廿個！」他表示因為時段關係，相信收視應該不俗，現時未知會否添食，但希望可以到台灣及上海取景。

叫小儀打「突」擊

記者昨日致電金剛，談到「亞生」的3D攻勢，他說：「我哋乜D都有，小儀都有D，我最少都有38D，唔怕！其實第一集嘉賓好強勁，有視帝黎耀祥，希望延續上一輯威勢！」當記者笑金剛跟「亞生」身材有得揮，他說：「冇見過佢哋呀！都係着三角褲激凸嗰啲囉，我哋夠有凸，小儀都係凸，但係核『突』個突！」