李卓庭一身債萌退路

歌手李卓庭近年人氣下滑，她承認多次萌生退出念頭，但每次絕望時總有「貴人」及「機會」出現，令她學會把握及珍惜，故不輕言放棄。

李卓庭（Eunix）出道時氣勢如虹，勇奪「生力軍女歌手」金獎，可惜人氣未能承接，近年多次傳出她欠唱片公司數十萬。將於下月14日舉行音樂會的Eunix日前接受本報訪問，問到為何仍堅持在樂壇發展？她說：「其實都諗過不如搵份收入穩定嘅工，奈何每次想放棄都會出現機會同轉機！」

身為基督徒的Eunix表示信仰幫了她不少：「每次想放棄都靠佢，真係試過銀行得番2位數。」即將踏入3字頭的Eunix自知不可以再浪費時間：「每次有機會都好好把握同珍惜，唔可以咁易放棄！」問到會否覺得路途坎坷？樂觀的Eunix說：「唔可以咁講，人生有好多經歷，如果成日諗放棄就做唔到歌手。」

仲爭公司錢

問到現時是否仍欠唱片公司錢？Eunix大方承認：「係，其實都幾悲哀，依家仲還緊第一間唱片公司嘅錢。（有錢還？）好彩有經理人，加上久不久出席活動，都支持到生活費。」她又感激父母及姊姊的體諒：「父母知我冇乜收入，都冇問我攞家用，家姐仲好，會買嘢畀我。」