陳偉霆下體中招

陳偉霆（William）、曾志偉兒子曾國祥及徐少強兒子徐偉棟（Edward）日前在《娛樂onShow》大爆拍英皇電影《紮職》的辛酸史，對工作甚為認真的他們更是搵命博，當中William為求逼真，更真人上陣經歷「男人最痛」！

陳偉霆與星二代曾國祥、徐偉棟日前獲邀來到《娛樂onShow》擔任嘉賓，與主持俞詠文（Angela）大談英皇電影《紮職》拍攝時的苦與樂！電影題材講蠱惑仔，他們拍攝時也不乏打打殺殺場面，當中William為求逼真，不惜要求泰拳高手吳浩康（Deep）用真力打「小William」：「Deep一開頭話要借位摑我，但我話唔好，仲叫佢用盡全力打我，結果摑完我五、六下之後，我個頭已經開始暈，跟住佢一腳伸落我下面，而我又冇戴護陰，痛到我成個人彈起！」

至於同樣夠搏的還有曾國祥，在拍攝一場追斬戲時，因過度投入而變血人：「嗰場戲其實係『劈友戲』，拍嘅時候武指有提我記得避開個血包，但因為我太入戲係咁不斷斬，有一下真係畀個血包射中，搞到成塊面都係紅色！」而Edward提到拍戲的驚險場面時說：「有一次要喺天橋上以一敵百，殺出重圍，不過最危險係要喺欄杆邊度打，只要唔小心就會跌出去！」

與詩雅默契佳

William在片中飾演社團大佬，當然也有不少美女埋身，更與昔日拍檔詩雅有埋身肉搏場面，問到是否與詩雅拍親熱戲時已變得揮灑自如？William說：「其實呢套戲以男性話題為主導，所以愛情線比較少，但難得可以同詩雅合作，同佢嘅默契好好！」

而Angela亦知道William向來對於女友蔡卓妍隻字不提，為滿足觀眾的求知欲，她再接再厲向William發出問題攻勢：「我知道你拍戲時候嘅底線好低，但作為男朋友嘅你，會唔會驚女友蔡卓妍唔鍾意？」William並無中伏，更向Angela大耍太極說：「冇計啦！做嘢嘛！做好自己啲嘢先！」