何韻詩封口拒提祖兒

勇敢站出來承認「同志」身份的何韻詩，對婚姻、家庭生活非常嚮往，計劃將來返加拿大註冊結婚，曾與容祖兒不能分割的阿詩，堅決地不肯回答有關這位「密友」戀情的問題，但坦承過去與圈中人拍拖承受着不為人知的壓力！

阿詩開腔親證「同志」身份，引起很大回響，35歲的她直言有結婚目標：「我都一把年紀！我係好嚮往家庭生活嘅人。」持加籍護照的她坦言返加拿大結婚是唯一選擇：「唔通等香港同志婚姻可以立法咩！到時我諗都6、70歲，我驚我冇咁長命！」阿詩甚至有計劃領養BB，她說：「見到好多外國夫婦領養小朋友，其實唔係完全關乎我嘅性取向，而係覺得應該要做呢樣嘢。」

阿詩自爆入行後才第一次談戀愛，她相信行內人早知其性取向，她說：「都係一個公開秘密、默認狀態，我從未正面否認。」獲父母支持的阿詩表示早在二十多歲時，父母已意會到她的同志身份，問到女友曾否見家長？她說：「以往真係正式嘅另一半佢哋係知道。」

望獲世人祝福　

過往有不少緋聞的阿詩，跟祖兒的「密友」關係最惹人談論，問到與祖兒拍拖是否事實？她不置可否說：「唔答！大部分（緋聞）係假！」對祖兒與劉浩龍拍拖、三人的友情關係等問題，阿詩以堅定口脗說：「唔答！（不再三人行？）乜嘢呀？你自己有眼睇啦，仲要去評論。」

談到對「雙性戀」的看法，阿詩認為愛是講求內在，她說：「愛呢樣嘢最尾都係講個心，個心係冇性徵，呢個世代好多人可能有兩方面經驗。」阿詩承認與圈中人拍拖有一定壓力，至於可曾被棒打鴛鴦？她感慨說：「唉！無論同任何人拍拖，對方嘅家長、身邊人都有壓力，咁多年嚟同性戀喺社會同娛樂圈咁有爭議性，我希望有一日有另一半時可以公開，得到大家祝福！」

此外，阿詩昨日接受查小欣專訪，有指祖兒被她拉落水扯到雙性戀問題而崩潰，她無奈說：「每次都係記者提起祖兒，我只係作答完全被動。」她表示沒有致電慰問祖兒，因為非她親耳聽到，所以不會當真。對事件影響到與祖兒的友誼感到可惜嗎？她抖大氣說：「佢公司表明唔想我提佢，我實在唔方便再回答關於佢嘅問題。」