Baby食物中毒「失憶」

內地型男黃曉明早前牛一，被拍到與緋聞女友Angelababy慶祝，不過Baby竟以食物中毒為由「失憶」，但最後仍甜蜜默認為曉明慶生！

早前Angelababy與緋聞男友黃曉明被拍到撐枱腳慶祝男方生日，前晚Baby出席品牌Jimmy Choo活動時，刻意迴避問題，更以食物中毒扯開話題，她說：「我第一次食物中毒，好辛苦！我要入醫院吊鹽水，仲嘔咗一個鐘，搞到瘦晒！我已經瘦無可瘦！（曉明心痛？）小災小病是福。」問到是否與曉明同樣食物中毒？她否認：「總之冇一齊慶祝！」再扯開話題表示早前為金馬獎試衫，並碰見葉德嫻：「我哋撞咗幾次，好有緣，感覺好似我婆婆咁親切！」

記者再追問她是否與曉明慶生？她即扮失憶：「唔記得！（冇探你？）唔講得！（慶完生係咪一齊返酒店？）唔好諗太多，冇下文。（曉明高調談論喎！）做人低調啲好。（送乜畀曉明？）食物中毒，失憶！」問到曉明是否慶祝完後送她離開？她則點頭，間接承認與曉明慶生！她又透露自己的手袋中最貴的價值30萬港元，更笑言將來要一定生女，可將自己的服飾留給她。

羅愛欣有餡四個月

同場的羅愛欣懷有四個月身孕，仍勤做運動，她解釋：「我好驚腫脹，我仲戒埋酒同凍飲，預產期係出年四月，計劃順產。我依家佗女，想追多個仔！」而何嘉莉大讚囝囝肥嘟嘟很可愛，又公開投訴老公：「佢未試過幫手換尿片！」