湯盈盈佗蛇女

錢嘉樂和湯盈盈昨晚筵開55席大宴親朋，圈中不少明星畀面到賀，佩戴千萬鑽飾的盈盈雖然是大肚新娘，但仍谷出G奶賣大包賀新婚，兩口子對腹中塊肉性別大賣關子，卻被爆是佗女！

現年47歲的錢嘉樂與37歲的湯盈盈昨晚假尖沙咀洲際酒店擺喜酒筵開55圍座無虛席，做老襯兼即將做老竇的嘉樂聯同大肚盈盈以切餅形式，公布腹中塊肉性別，賓客須在紅紙寫上答案玩競猜遊戲，贏取泰國商務客位來回機票。不過，嘉樂哥哥錢小豪被問到盈盈有喜，他不知是通水還是順口：「太好喇！送個表弟（註：應是堂弟）畀我個仔，可以幫輕吓佢哋啲利是！希望快啲生多啲！」

冧爆愛的宣言

證婚人的曾志偉強迫嘉樂說：「我以後都唔滾！」盈盈說：「講大聲啲！」當宣布新人可以咀時，盈樂急不及待連咀兩次，盈盈大嗌：「Yeah！」，當她俯身大笑時，其G奶更是無「乳」倫比。祝酒時盈盈向愛郎發表愛的宣言：「我等今日等到頸都長，我真係好鍾意嘉樂Very Very Much！」全場起哄。

昨午4時45分，婚禮搞手梁靖琪（Toby）大派100元利是，而鄭伊健則綵排新人出場歌曲《同一秒》，在佘詩曼、周家蔚、文頌嫻、鄭伊健、謝天華、洪天明等各12人兄弟姊妹團簇擁下，一對新人於下午5時接受訪問。挺5個月巨肚的盈盈穿上低胸婚紗，胸前「G奶」夠晒壓迫感。盈盈在長樓梯步下時，有老公嘉樂扶實之餘，Toby和鍾麗淇在旁攙扶，恍如太后出巡。拍照時，嘉樂和盈盈例牌錫錫，一吻再吻，嘉樂又不時輕撫老婆巨肚，恩愛到暈！嘉樂表示若嘉賓估中盈盈腹中塊肉性別，可贏機票，問是否包食宿？他笑說：「自己搞掂，食飯盒啦！」他表示沒有去想婚禮講甚麼感受。問到婚禮使費？他說：「大約過百萬，仲有千萬鑽飾同禮餅贊助！」

香香到賀冇尷尬

當記者指盈盈挺着巨肚結婚，嘉樂笑說：「買樓咁就好喇！」他更大談如何抱得美人歸：「緣分大晒！我哋識咗好多年相處過覺得佢份人好簡單，一啲都唔複雜！」在旁的盈盈聽老公如斯讚美，立即挺胸左右搖擺，露出自鳴得意的樣子！嘉樂見嬌妻胸前偉大，大講有味笑話：「你睇佢廳大房都咁大呀！」盈盈撒嬌說：「希望唔好寫我谷奶啦！咁核突！」問外父有何訓示？嘉樂情深款款地說：「同我講盈盈係傳家之寶，當佢係公主一樣，叫我識做！」問盈盈有沒有喊？她說：「今日冇，註冊嗰日就有。」另外，曾與樂樂傳緋聞的岑麗香趕赴會，曾有傳不獲邀請的岑麗香指一早已獲盈盈邀請，問到會否因曾跟樂樂傳緋聞而尷尬？她說：「我都有咁諗，但大家都知冇嘢就唔會尷尬。」