子丹詩詩行善到羅馬
甄子丹前晚出席活動時透露，太太汪詩詩因出席另一活動而未能陪伴，但否認兩夫妻分頭搵銀：「唔一定搵錢，活動唔一定商業，家庭或者慈善活動都得。我今晚就會同太太一齊飛去羅馬，代表香港做慈善活動。（順道玩吓？）冇真正玩嘅時間，我工作時太太都有工作，但都會盡量攝時間撐枱腳，其實我哋兩個一齊見面嘅時間唔多。（咁啲仔女呢？）小朋友有外父外母湊，好多謝佢哋，自己成日都行開行埋。（爭取同太太二人世界？）人生咁短，要珍惜每個時刻，我同太太平日各有各忙，好珍惜見面嘅時間。」他又透露月底會開新戲《冰封俠》，但不肯透露女主角是誰。同場的張靜初則表示最快到12月份才開戲，稍後會演出一個長達七個半小時的話劇：「會於亞洲巡迴演出。（有冇親熱戲份？）大家到時看看。」
型「丹」隻影撐場，難怪他呻與太太的見面時間太短。
張靜初趁未有戲拍頻頻出席活動。