周永恒夜蒲畀女擒

音樂人周永恒與前歌手趙頌茹剛於上月再添千金，Roy前晚外出玩天光，被人目擊在夜店與辣妹又攬又錫！他昨日承認醉到「斷片」，但否認攬女過夜！至於趙頌茹則說：「老公真係唔好彩喇！」

音樂人周永恒（Roy）與趙頌茹（Yu）於2010年結婚，短時間內已生下兩名寶貝，上月阿Yu更為Roy誕下二女愛希，以前「壞孩子」性格的Roy頓成「顧家男」，加上成為基督徒不時為教會當義工，變得修心養性。不過，前晚有讀者爆料指Roy在尖沙咀棉登徑的酒吧出現，身邊除有影星狄龍兒子譚俊彥外，Roy身旁還有位辣妹，酒吧內毫不避忌公然又攬又咀，隨後Roy與辣妹更消失影蹤！

對於被指夜店攬女，Roy昨日接受訪問時，承認前晚與一班朋友在酒吧飲酒，並強調好耐冇蒲，只是「放監」一日，問到攬女一事？他即說：「冇冇冇！（話你又攬又錫喎？）咁大鑊！有冇相先？有圖有真相！」他坦言當晚沒有回家，因到酒吧之前已飲了不少酒：「飲到12點幾已經醉咗斷晒片，乜都唔記得！（去咗女仔屋企過夜？）梗係男仔屋企啦！」對於被指與辣妹親暱舉動，他堅稱：「唔記得，冇印象！（錫晒喎？）咁狼？真係唔記得！」

「放監一日就畀人報料」

另一邊廂，阿Yu閉關在家湊女，對於Roy撇下老婆「玩天光」，她不諱言：「係呀！佢尋晚冇返屋企，我好擔心佢人身安全，自己尋晚湊女都冇瞓過，見佢今朝返嚟咪問佢『乜咁早呀？』」有指Roy被辣妹攬啜，她表示沒有嬲，反問記者有冇相睇，更抵死說：「老公真係唔好彩喇！放監一日就畀人報料！（驚Roy出軌？）冇得驚！（要佢戒酒？）唔係我叫，係佢嘅選擇！（身為人夫要檢點？）暫時未覺佢有不檢點行為！」