嘉樂寡佬P除剩底

錢嘉樂迎娶大肚老婆湯盈盈當然開心到癲，為慶祝成為老襯，嘉樂前晚相約曾志偉、金剛和洪天明等一班死黨開「Pool Side寡佬趴」，「獎門人」志偉更剝剩底橫率先跳池，與新郎哥及眾兄弟一起光豬跳，賀嘉樂告別單身！

單身47年，錢嘉樂終於告別寡佬生涯，前日與有餡嬌妻湯盈盈舉行熊貓婚禮，盈盈樂樂今晚假洲際酒店設喜宴，筵開50席。為慶祝嘉樂擺脫單身，曾志偉、金剛、謝天華、鄭伊健、錢國偉和洪天明等十多個死黨，前晚為他在酒店舉行「Pool Side寡佬趴」，就連侍應都是清一色是男性，全程謝絕雌性動物出席，一於男人大晒！

據知，「寡佬趴」全晚醉High，十幾個大男人愈玩愈癲，最好笑是金剛略嫌清一色都是男人，Dry到冇朋友，惟有轉移目標狂玩新郎哥嘉樂，但嘉樂即使不被人隊都自隊，豪飲千杯幾乎啤啤夫。

天華Chok鬥姊妹

向來搞鬼的志偉見室外寒風陣陣，突然興奮到頂剝光豬，除剩底橫「Bom」一聲跳落泳池，其他兄弟見狀也拉埋嘉樂剝衫跳埋一份，還掟侍應落水，池中十幾條肉團浮浮沉沉，相比盈盈日前與佘詩曼、周家蔚、文頌嫻等姊姊搞的Ladies Night，男子組的確狂野得多。

記者致電天華，問到前晚的光豬跳，他說：「人人都冇諗過落水o架！係志偉跳咗落去，我哋都剝埋跳落去囉！不過有啲人都有着面褲嘅！」天華表示雖然今日做兄弟，但仍未收到姊妹團通知玩甚麼遊戲，只是收到「柯打」早上10時準時現身酒店。談到姊妹團齊齊性感出擊，他即說：「我哋夠好Chok啦！個個三件頭西裝兼戴晒煲呔o架！」

BB狂踢扮C朗

嘉樂搞「寡佬趴」，老婆盈盈則留守等老公乖乖返酒店，談到成班大男人玩到癲，她在電話說：「開頭仲以為佢哋唔搞，我一直有同佢哋微信，知道佢哋仲掟埋個侍應落水，錢國偉仲話拖30幾個靚女嚟！成班男人又扮女人聲激我！」問到新郎又醉又攰，有沒有洞房？盈盈笑說：「我哋咪好似阿旺同宣萱咁踩住個桶戙一戙囉！其實冇做過任何嘢，全日只係一齊瞓覺咋！」盈盈又表示腹中塊肉近兩周狂踢她的肚，前日簽字一刻更愈踢愈勁，可能是感受到父母的喜悅才會扮C朗。

身為大伯的錢小豪表示，因今晨要湊仔，所以不會湊熱鬧接新娘，但下午會準時到達酒店：「全家上下都好開心呀！尤其係阿媽，雙喜臨門又娶新抱又抱孫！」為盈盈樂樂籌辦婚禮的梁靖琪透露，今日凌晨零時會依足傳統上頭，中午接新娘，為保私隱，全程都是在酒店室內進行。

婚宴小資料

地點：尖沙咀洲際酒店

圍數：50席

兄弟姊妹團：金剛、王祖藍、錢國偉、鄭敬基、鍾麗淇、文頌嫻、周家蔚、梁靖琪等

司儀：金剛、小儀

星級嘉賓：成龍、洪金寶、元彪、元華、佘詩曼等

布置：盈盈愛花，會場將布置成花海

賣點：競猜盈盈肚裏BB性別遊戲，新人切蛋糕時若是朱古力代表男，若是士多啤梨則代表女。