樂足咀頭娶盈盈

47歲的錢嘉樂終告別寡佬生涯，昨日迎娶年輕十年的有餡女友湯盈盈為妻。盈盈樂樂史無前例搵大熊貓「盈盈」做證婚熊貓，既浪漫又實在，難怪兩口子咀足四輪，腹大便便的盈盈還腳踏三吋高踭鞋谷胸晒G奶！

繼剛晶大喜及杜德偉迎娶嫩妻後，喜事一浪接一浪，錢嘉樂與湯盈盈昨日結束五年愛情長跑，在50位親友見證下，在海洋公園大熊貓館簽字拉埋天窗，還應景地搵大熊貓「盈盈」與「樂樂」做證婚熊貓。可惜因盈盈樂樂並非住在一起，封館後只得「盈盈」一隻熊貓見證嘉樂告別單身，但兩人已是香港開埠以來搵大熊貓做證婚人的首對新人，夠晒威啦！

昨午一時，嘉樂與盈盈的熊貓婚禮準時開波，身穿西裝的嘉樂Sharp醒到暈，懷有愛郎五個月身孕的盈盈懶理危險，腳踏三吋高踭鞋勁貪靚，睇見都牙煙！她還穿上雪白婚紗，谷出人生高峰的「G奶」，極具視覺壓逼感，難怪在旁的嘉樂全程露出勝利笑容，開心到震！盈盈的婚紗腹部有褶，似乎想刻意遮掩巨肚，其無名指上的兩卡鑽戒更閃爆眼簾。

席上，在律師與「盈盈」的見證下，嘉樂與盈盈在婚書上大筆一揮，正式成為夫婦。兩口子隨即到附近的熊貓餐廳接受逾百傳媒訪問。當徐徐步下之際，一對新人已向傳媒狂送飛吻，拍照時更有求必應狂咀四次，令洪天明、王祖藍、錢國偉、鄭敬基、鍾麗淇、文頌嫻、周家蔚與梁靖琪等兄弟姊妹團起哄，更着一對新人伸脷「打車輪」，嘉樂聞言笑說：「乜你哋咁粗俗o架！」

爆老婆簽字眼濕濕

問到穿上高踭鞋險象環生，盈盈說：「真係好攰又腳痛，但都OK嘅，唔驚，有佢扶我嘛！」嘉樂即插嘴說：「嘩！唔好畀阿姐（汪明荃）知，佢講過話我點解仲畀盈盈着高踭鞋。不過，佢以後人生有老公扶住！」談到讀出誓詞時，嘉樂自嘲英文不好，只懂講「I Do」：「讀嗰時一剔搞掂，冇錯字同懶音，簡直係快版King Sir（鍾景輝）！」提到在熊貓館行婚禮，他說：「行到呢步都遲咗，本來好緊張，因為未試過結婚，但近期好順利，全世界都幫我做好呢件事！我同老婆今日最早到，喺度搞都好貼題，盈盈樂樂嘛！」盈盈見老公情深款款即說：「見佢咁嚴肅，真係好感動！」嘉樂即爆太太簽字時感動到喊！至於婚禮使費，嘉樂豪氣地說：「盈盈話錢唔係問題，佢包埋我，唔使做啦！」還透露兩卡鑽戒價值不菲：「搞到我要拍多幾部戲！」

婚宴公布BB性別

問到對嘉樂有甚麼要求，盈盈說：「平常咁得喇！唔使轉，我哋之後都要做人哋父母啦！」而嘉樂則說：「本來諗住旅行結婚，但就做人父母，都係一步一步先啦！蜜月都係等BB出世先！」此言一出，盈盈冧爆望實愛郎。

另外，提到盈盈腹中塊肉是仔或女，兩人即異口同聲大賣關子，指留待明日洲際酒店婚宴揭盅：「嗰日有個遊戲玩，最後如果我哋切士多啤梨蛋糕就係女，如果係朱古力蛋糕就係仔！」嘉樂笑言有諗過BB名字叫「錢進進」：「唔通叫『錢世』同『錢七』咩？」離開公園時，一對新人不停跟纜車乘客揮手，恍如出巡。