軒仔送「熊」搞喊胡鴻鈞

「巨聲二幫」胡鴻鈞（Hubert）前晚舉行處男騷，張敬軒任神秘嘉賓撐場，更抱着熊啤啤公仔贈興，Hubert感動得踎低啜泣，兩人更在台上擁抱三次，再惹斷背疑雲！

胡鴻鈞前晚在九展舉行處男音樂會，除家人及一班巨聲幫好友支持外，更獲老闆何哲圖及樂易玲頒發金唱片銷量獎，師姐鄭欣宜亦脹爆撐場任嘉賓，Hubert說：「我幻想自己開音樂會時，一定會請佢做嘉賓！」欣宜則大講有味笑話：「乜你對我有幻想o架？」Hubert解釋指對方性格大情大性，但開口唱歌時則像天使，欣宜打趣說：「你似踩我多啲喎！」

扮失蹤送驚喜

張敬軒穿緊身黑色西褲突襲，任神秘嘉賓，更手抱巨型熊啤啤公仔冧Hubert，Hubert甫見軒仔即感動得變喊包，更跑到台的一邊踎低啜泣，軒仔說：「佢上次上嚟彈我部琴，但部琴得我可以彈，冇人敢掂！」兩人大唱情歌《只是太愛你》，更肉緊地擁抱了三次！其實軒仔與男校出身的Hubert性向一直成疑，兩人曾分別與許廷鏗傳「斷背」，名副其實「三角錯」！

完騷後，軒仔急急腳離場，Hubert則踢爆他曾失蹤玩驚喜：「之前成個月搵唔到佢，巴黎返嚟香港後又唔覆機，我真係嬲嬲哋，但原來佢係為咗今日製造驚喜！（怕被傳斷背？）軒仔係教後輩，唔怕斷背！」