苟芸慧奪命「剪蕉」

早前被網民封為鄉音四人組之一、來自多倫多的前華姐冠軍苟芸慧，昨日出席新劇試造型記者會時，把袁偉豪飾演的展昭說成「剪蕉」，聲稱會苦練廣東話的苟姑娘真是笑大人個口！

苟芸慧、關詠荷、歐陽震華（Bobby）及袁偉豪等，昨日在電視城出席電視劇《情逆三世緣》試造型記者會，身穿古裝並女扮男裝的「女神」苟姑娘官仔骨骨，十足古代美少年，可惜一開口便驚為天人！她在台上介紹劇中角色，表示會與飾演南俠展昭的袁偉豪有感情線時，不慎將展昭講成「剪蕉」，嚇窒袁偉豪之餘亦令人忍俊不禁，苟姑娘實在要多花心機惡補廣東話呢！

關詠荷放逐愛女

而Bobby與關詠荷自《陀槍師姐》系列後久未合作，今次有機會再續前緣，他們在新劇會穿越時空演繹三個角色包括「包公」，令久休復出的關詠荷可過足戲癮！問到劇本是否為他們度身訂造時，他們即互笠高帽，Bobby笑說：「叫得佢返嚟拍就梗係度身訂造啦！」關詠荷則說：「係度咗Bobby個期先寫劇本！」

問到會否因忙拍劇而忽略囡囡，關詠荷笑說：「放佢去寄宿囉！由佢自生自滅！同埋依家都要佢學獨立，自己洗衫同煮飯。」