朱璇鄉音No.1

「自來華姐多女神」，華姐朱璇亦是其中一人！索爆的她卻不願承認女神地位，更揚言以演醜女為目標！自認是「鄉音No.1」的她更高呼想以舒淇為目標，在事業路上獨創一片天！

華姐自鍾嘉欣開始幾乎「屆屆出女神」，其後的陳法拉、苟芸慧，以至近期Hit爆的「香香公主」岑麗香都受盡宅男歡迎。華姐除了樣靚之外，大多是從外國回流，「講嘢唔正」增添異國風情，網民無不大讚Kawaii！當中被冠以「女神」美譽的還有2008年國際中華小姐冠軍朱璇，她擁有冷艷又脫俗的面孔，嫣然一笑時更令人內心融化！不過她卻自行降「呢」：「做神仙都會辛苦，而且我咁平凡。呢個只係一個稱呼，冇乜特別意思！」

讚李亞男零缺點

朱璇竟然最想做醜女挑戰演技：「拍戲方面好多嘢都想試，除咗演靚女！例如神經病人，或者好核突嘅人，甚至係最普通嘅師奶，我都會覺得好好玩！我唔介意唔化妝出鏡，希望畀大家睇到我唔同嘅一面！」打破美女形象，豈不令一眾宅男傷心欲絕？朱璇搖搖頭說：「畀人定義為靚女唔係一件開心嘅事，因為靚女好似張相咁只有一面，好難畀人睇到唔同方面嘅自己！」而她心目中的女神則近在咫尺：「我會揀李亞男！同佢熟咗，覺得佢對自己要求好高，但對人又好Nice，喺佢身上搵唔到任何缺點！」聽完朱璇這樣說，頓覺亞男男友王祖藍很幸福！

不少華姐女神的共通點是「講嘢唔正」，朱璇亦不例外！她坦言惡補廣東話後依然搣唔甩「鄉音」：「我發現講廣東話已經變咗心理問題。」提到早前在劇集《怒火街頭II》中，金剛、賈曉晨、苟芸慧及岑麗香被嘲「鄉音四人組」，問到會否擔心同樣被狠批？朱璇竟自嘲：「我好明顯係佢哋之中鄉音最重嗰個，我係『鄉音No.1』！我唔驚o架！」但她希望觀眾可欣賞她的其他優點：「我都明佢哋聽唔清楚你講乜嘢的確好忟，但如果佢哋見到我哋其他方面都有努力，我哋會開心啲！不過觀眾會慢慢欣賞演員嘅唔同方面，好似大家都接受咗金剛嘅廣東話一樣！」

想似舒淇咁自然

金剛自創了「金剛式」廣東話令港人接受，主持工作不斷，問到會否想成為女版金剛？朱璇立即耍手擰頭並笑說：「Oh No！我希望好似舒淇咁！雖然佢廣東話唔係百分之百標準，但講得好自然！（「講嘢唔正」成為必殺技？）已經用咗好耐，呢幾年都係咁！」

後記：華姐升呢之路

訪問當天，朱璇試穿了幾套衣服，唯獨這條紅色連身裙最適合她！儼如「火美人」的她拍攝時自動波擺出多款誘人甫士，笑時又瞇起雙眼，電力十足！加上她塗上深紅色唇膏，此時此刻，我想起了經典女神瑪麗蓮夢露！