口快快公開關係 Baby提曉明冧笑

宅男女神Angelababy（Baby）與黃曉明雖從未親證戀情，但早已是公認的一對！早前曉明接受訪問時更默認Baby女友身份，難怪她昨日出席澳門活動時，全程冧爆甜笑，還口快快爆二人關係不是秘密！

昨日Baby穿上V領連身裙出席澳門一個開幕酒會，手腕還自行畫上星星圖案。提到緋聞男友黃曉明早前接受《最佳男主角》訪問，坦言首次見面已覺得她很美，她即冧爆說：「我冇睇，學佢講，佢好靚仔。（係咪戀情明朗化？）冇呀！都係專注工作，有重要事情先再同大家交代。（咩重要事？）結婚生仔會同大家講。」

至於曉明在訪問中還自爆曾在酒店Ballroom擺滿玫瑰花為女友慶祝生日，而Baby亦曾在微博上載玫瑰花相，問曉明口中的「女友」是否她本人？她即嬌嗲地說：「唔好講啦！真係好衰o架！呢個唔算係秘密啦！（佢好浪漫？）佢自稱係，我睇佢新聞見到咋！」但拒答對方為她做過甚麼最浪漫的事，記者笑問她玫瑰花慶生是否最浪漫？她甜笑說：「哎吔！可能佢講其他人呢，唔好對號入座啦！」

莊思敏「唔夠秤」

至於曉明快將生日，Baby稱未知如何度過，亦未買禮物。提到他倆某年被拍得在澳門放煙花過生日，Baby即口快快自爆：「嗰次係新年。」提到對方力撐她沒有整容，她感到開心，並表示的確沒有整容。

同場的莊思敏自爆前晚入賭場時被保安截停Check身份證，問她是否夠21歲，她笑言這是近十年來首次被查身份證。