連詩雅原諒劈腿男

連詩雅自言戀愛大過天，一拍拖便會全情投入，甚至重色輕友。她更揚言就算發現男友劈腿亦會原諒他，是超級心軟的巨蟹女！

每個女生都希望擁有42吋長腿，但連詩雅（Shiga）慨嘆難找男友：「我好少識啲高過我嘅男仔，矮過我真係接受唔到，因為冇安全感，我想伏喺人心口！」拍過5次拖的她自言是個愛情大過天的小女生：「當我鍾意一個人嘅時候，會忽略咗身邊嘅朋友，同埋情緒好易受影響，好易唔開心，佢做少少嘢，我已經好大反應！」

再見不是朋友

愛的反面就是恨，愛恨分明的Shiga非常認同：「我係再見不是朋友嗰種人，愈愛一個人，分咗手就愈難做到朋友！」話雖如此，未分手時的Shiga卻是非常心軟：「我會畀男友3次做錯事嘅機會，就算佢一腳踏兩船，如果佢肯坦白同我講，我都會畀次機會佢。因為我覺得要對好愛嘅人坦白呢樣嘢係好需要勇氣，但如果佢係同咗我個好朋友一齊，我就會即刻死心，一次機會都冇！（試過被撬牆腳？）咁又冇喎！可能我疑心重，如果男友同某個女仔特別Close，我好易Sense到。（會Check男友電話？）如果我Sense到有嘢會問佢睇唔睇得，佢話唔得咁即係有嘢啦！」

另外，早前DJ路芙和阿T舉行「心目中擁有最修長美腿」選舉，Shiga榜上有名，問到美腿定義是甚麼？路芙說：「要合比例同骨肉均稱，其實我覺得有個男仔對腳先係最靚嘅，就係Dear Jane嘅Jackel！」Shiga立即搭嘴：「係呀！又白又滑，個Shape又靚，仲要冇毛！淨係睇對腳真係唔知佢係男仔！」