張繼聰論盡前世今生

歌手張繼聰（Louis）日前擔任《娛樂onShow》嘉賓，大談如何面對逆境及「前世今生」！談到太太謝安琪（Kay）時，更毫不避忌地大讚她脾氣好及可愛，認真Sweet爆！

張繼聰（Louis）日前接受《娛樂onShow》訪問，與主持俞詠文（Angela）大談對生命的看法！問到有關「前世今生」的概念時，他說：「有啲人冇學過影相，但對鏡頭方面好有才華！其實呢樣嘢係你嘅靈魂學過呢樣嘢，你今世再攞番嚟用！而我覺得每一個人嚟到呢個世界都會有功用，而我今世嘅一個責任就係同人分享更多活得自在嘅方法！」Louis熱愛研究宗教及哲學，問到太太是否很支持他？Louis竟然打趣說：「我諗我老婆依家冇同我離婚，至少佢唔抗拒先！」

同「仇人」食飯

此外，Louis出道至今，與太太謝安琪經常被攻擊，他說：「其實我同太太都好慶幸有發生過呢啲事，我成日都諗如果有《回到未來》架車，我都決意唔會改變現時生活狀況！我冇怪過寫我嘅人，我仲曾經同寫過我嘅人食飯，因為我明白佢哋嘅立場！嗰幾年嘅經歷畀我不斷反思，例如我係咪一個有用嘅人、我嘅音樂有冇價值等等，反而覺得呢段時間係一種好珍貴嘅經驗！」

Louis已懂得以豁達的心情面對負面新聞，當Angela問他會否與直率太太分享生命的經歷？Louis即大讚太太EQ高：「其實佢好叻！當然佢係一個好出名嘅女歌手，好多人都好似好了解佢，但其實有幾多人又真係認識佢？我諗我係可以接觸到比較全面嘅謝安琪，其實佢不嬲都係一個脾氣好好、擁有可愛活潑一面嘅人！」