黃智賢無欲無求

黃智賢與太太相識相愛超過廿載，對彼此的性格瞭如指掌，深明二人皆非當父母的好材料，因此婚後三年已協議不會有下一代。物質追求方面他們更已昇華到無欲無求，由曾經擁有兩部名貴跑車到只用十幾萬的汽車代步，只求自己過得舒服。

我同太太諗好咗唔生，意外有咗又係另一樣嘢，個天畀你就唔同。我哋冇呢個計劃，冇呢個耐性，責任好大，我哋都覺得呢個擔子好重，唔係咁啱我哋！決定咗唔生之後，就向冇小朋友嘅方向諗，諗冇小朋友嘅好處係乜，我覺得「無憾」就係唔好反反覆覆去後悔，大家都向好嗰邊諗，依家個責任好大，香港嘅教育制度，或者社會，都令我有不安全感，唔覺得適合有小朋友。

價值觀不停變

結婚時仲未好確定，結咗三年先傾，大家都知道對方性格，拍咗拖十四年，結咗婚七年，對大家幾認識o架喇，你啱唔啱做媽咪，我啱唔啱做爸爸，其實大家都知唔好。

我哋好細個識，其實大家都成長緊，由當初嘅o靚仔o靚妹到依家，好似見證住對方嘅成長，縱使當中廿年入面價值觀都一路變緊，以前覺得重要嘅嘢依家我覺得冇乜所謂，可能同信仰有關。依家係冇咁物質嘅追求，以前大家嘅目標好想買名牌嗰類，依家唔係幾需要。我試過有兩架車，一架寶馬，一架凌志，跟住到依家，唔好煩喇，啲車蝕錢，唔保值嘅，十幾萬嗰啲就算喇，算係代步，唔使以前咁幾十萬架車，鬼咩，唔好喇，睇住架車係咁蝕，我理得人點睇啫，我自己代步之嘛，我自己架車，我一啲都唔覺得難睇呀！自己鍾意，十幾萬，冇乜壓力，一次過畀錢買就得，我唔想所謂充大頭鬼，我要一隻乜嘢嘅錶、乜嘢嘅車畀人睇，我代表乜嘢身價，已經過咗呢回事，理得你點睇啫！我就係我！

舒服開心就得

太太依家返工係孭布袋，以前唔得o架！依家係好有自己性格，逐漸希望做到唔理人，自己舒服開心就得。可能以前擁有、追求過，覺得呢方面好戇居，冇必要，只會無止境！（全文完）

後記：密室恐懼症？

小記發覺黃智賢每次換衫影相時，總是九秒九就從更衣室走出來，而且盡量不想在內裏逗留，他笑言可能跟年幼時曾困升降機有關：「好細個試過困升降機，真係困成幾粒鐘！咁我諗我又唔係有密室恐懼症，不過如果屋企冇人，我係唔會關門，我好怕換衫好窄，所以會盡快行返出嚟，我好怕焗，好要通風。」

口述：黃智賢

筆錄：韋芷茵