黃智賢不分忠奸

黃智賢當年演「好人」角色深入民心，近年開始頻頻做奸角，「辣薑」後又有「潘Sir」，演了超過廿年戲的他已看淡所謂忠奸，反而認為反派要靠有「力水」的演員才能托起套劇，而且浮游在二三線，反派的戲份一定最重。

都可以算係添哥（李添勝）第一個搵我做反派，《鐵血保鏢》開始逐漸咁演反派，你喺二線三線徘徊，未喺一線嘅時候，乜嘢戲份最重？反派嘅戲份最重。一個演員話唔做，唔係話唔得，咁即係推戲喇！你推得幾多部？不如你面對佢，克服佢，你話我係咪啱做反派？我最拿手嘅唔係做反派，不過既然機會嚟到嘅時候，我學識點做反派，點做一個壞人，係一個演員要做嘅事。

其實拍《真情》嘅時候，鄭子誠糟質馬蹄露嗰段戲係收視冠軍，到佢死嗰段又係好多人講，其實佢個人好好，都係演出嚟，不過做耐咗監製會定型。成日喺奸同忠之間糾纏，愈係糾纏我覺得愈係膚淺，做演員都唔係短日子，仲介意忠定奸？

為自己打氣

一個好嘅反派係托起成套戲，唔好睇小自己，有時都要為自己打打氣！「阿海」年代就成日搵我做嗰啲忠厚老實角色，做做吓都會悶o架！其實演員都係想求變啫，唔好咁悶，如果唔係就一成不變，好難有火！（明日待續）

口述：黃智賢　筆錄：韋芷茵