連詩雅 愛．卻步

入行3年的女歌手連詩雅（Shiga）現年24歲，她今年經歷了人生起跌，上了寶貴的一課！Shiga備受公司力捧，其近期Hit爆歌包括《I'm still loving you》、《到此為止》及《好好過》，在YouTube共錄得逾千萬點擊率，加上她今年提名金像獎「最佳新演員」，火速成為影壇新貴，獲賞識拍微電影，人氣急升！惟佳績背後，年中離奇流出Shiga與「Rap友」曲赤的陳年「脷疊脷」舌戰慾照，大膽程度令人咋舌，震撼娛樂圈。她為此事召開記者會，更全程哭崩！近日她又被指介入關楚耀與女友的感情，惟遭Shiga否認，並強調與對方只是好兄弟。

入娛圈練EQ

Shiga未被負面報道擊倒，重新投入工作，對於曲赤，她不欲多談，但承認今年的經歷令她成長：「好多人話入娛樂圈一年，好似喺出面打工十年咁，今年確係有呢種感受，但距離定下嘅目標仍然遙遠。（咩目標？）喺紅館開大型音樂會係每位歌手嘅夢想。」其實娛樂圈亦是EQ訓練營，特別是面對負面報道時，Shiga亦有深切體會：「不嬲忍耐力都高，入行呢3年尤其學識咗要理智，對負面新聞算Handle到，心態上亦樂觀咗。」

拍拖無分性別

Shiga再三強調現階段以工作為先：「我今年24歲，唔可以兼顧工作同拍拖。（抗拒圈中人？）最緊要夾得嚟。（驚冇男仔埋身？）冇諗過，但我唔會主動。（畀女生追求過？）冇試過喎！其實愛情無分性別。」問到是大女人還是小女人？她笑說：「感情方面，我覺得有Point就會堅持到底；反而喺朋友堆中，我係小女人，冇乜所謂。」

後記：性感？不性感？

連詩雅在電影中經常騷長腿，又於《喜愛夜蒲2》作大膽演出，問到往後會否收起性感？她說：「我本身唔係行性感路線，只係拍戲所需，我唔會刻意性感，但亦唔會收起性感，《喜》片已經係我嘅性感底線。」