JC驚「暈」封胸露膊

Jessica C.早前以超性感打扮出席活動時不慎露出乳暈，見過鬼怕黑，她前晚只穿露膊裝現身汽車活動，「峰」頭明顯輸給同場露半球的莊思敏！

有「警鐘胸」之稱的名模Jessica C.（JC）前晚身穿Off-shoulder Dress，出席平治汽車全新A系列A-ROCK派對，同場有穿透視Deep V閃片短裙的莊思敏及餅碎區文詩，太極樂隊則任表演嘉賓。

透出內半球的莊思敏可謂全場最性感，完全搶去JC風頭！JC坦言經過上次露暈事件後，揀衫更加小心，不想再有類似事件發生。問到有否駕駛執照時，她說：「有，喺LA（洛杉磯）一次考獲，我前前男友對車有研究，所以我對車都有認識。（你係咪安全駕駛者？）係，只係超速過一次。」問到會否在港買車，JC認為有需要：「雖然想買，但邊度泊呢？泊車先係問題。」

黐晒乳貼

而搶盡「峰」頭的莊思敏被問到有否做足安全措施時，她說：「有黐乳貼，呢條裙打唔到底。（怕唔怕移位？）唔驚！有照過鏡，而且我唔會太大動作。」提到有份主持的《爆足一周》訪問激嬲蘇永康？她表示睇報道才知道，如果有令對方不開心，講聲不好意思：「同佢私下冇聯絡，希望佢大人有大量，唔好嬲！（無綫有乜安排？）重新整理緊，未有新定案，希望2013年再見。（高層冇話2013年再開拍，係咪你哋一廂情願？）我知有好多傳聞同謠言，依家製作同事都各有各忙，可以抖一抖。（唔再用《爆》呢個名？）個爆字真係令大家有期望，如果再做會部署改名。」

同場的區文詩則透露萬聖節約了好姊妹吳雨霏及鄧麗欣（Stephy）等一大班朋友蒲天光，並透露當中以Stephy酒量最好，問到有否約傅穎同歡？她坦言已有十年沒跟對方聯絡。