岑麗香收1卡鑽戒即嫁

「宅男女神」岑麗香（香香）昨日出席珠寶預展，戴上500萬元鑽戒的她笑言像戴了一層樓上手，問到是否要收到5卡鑽戒才肯嫁，她笑說：「1卡都好滿足喇！」

香香昨日在中環出席英皇珠寶「曲萃瓊姿」珠寶首飾預展，身穿晚裝、梳起髮髻的她，佩戴總值700萬元的首飾，包括「雲霞喜鵲」系列的鑽石頸鏈及手鐲，其中一枚約重5卡的鑽戒已價值500萬元，高貴迷人！

由「宅男女神」變身「高貴女神」，香香笑言連搽潤膚露也擔心，要問過工作人員才敢搽，她說：「隻戒指有5卡，戴咗成層樓喺手。（你揀樓定揀鑽戒？）唔知點揀，始終女仔都鍾意鑽石，我都想買對鑽石耳環畀媽咪同婆婆。（有冇男士送過鑽戒畀你？）冇呀！我淨係收過頸鏈同銀器首飾，未收過鑽戒，不過有都唔會接受，因為好有意思，如果收即係肯定咗對方嘅地位。（一定要收5卡鑽戒先肯嫁？）我發夢啦！1卡都好滿足喇！」她還透露正為無綫台慶揀衫及首飾，非常苦惱，但事先張揚一定不會性感！

楊諾思讚真誠

至於邀請香香助陣的英皇鐘錶珠寶主席楊諾思則表示，會贊助對方台慶夜的珠寶，並透露香香是經過公司全體員工投選出來，她說：「我好少睇電視，同事覺得佢形象健康又爽朗，今日見到佢真人，覺得真人更好，仲靚仲瘦，個人又真誠，可能同外國返嚟有關，佢好可以代表時下時尚嘅年輕人。」