陳祉妤孭起頭家

陳祉妤在家中排行最大，身為大家姐的她自覺要肩負照顧家人的重任，努力工作令家人生活更好。無論遇上甚麼風浪，她都習慣一個人捱過，不告訴家人，不想年邁的母親為她擔心。

口述：陳祉妤、筆錄：名人組

家庭喺我心目中係排第一位！我家庭觀念好重，同屋企人關係好Close。喺屋企我排行最大，係大家姐，自然覺得有責任要養屋企。壓力？梗有，但唔會覺得係負擔！我想令爹哋、媽咪、細佬妹食好住好，改善佢哋嘅生活質素，因為我好愛錫佢哋。

冇工開拒做死狗

對住屋企人，我從來報喜不報憂，唔想佢哋擔心。喺早年冇工開嗰段日子，我冇同屋企人講過半句，咬緊牙關撐住，積蓄都幾乎用晒！我想爹哋為我感到驕傲，所以一直都好努力，嗰段時間亦繼續Manage好自己，Keep住個狀態，有時會去幫朋友手，就算係冇錢，希望In Return有工作返嚟。我仍然用樂觀同積極嘅心態面對逆境，其實可以死狗咁返澳門同屋企人講，但我唔係咁嘅性格，唔會咁做！

上個月我原本Plan咗同媽咪去峇里旅行，點知出發前喺露台唔小心跌親撞咗落舊石度，流晒血要入院縫針，去唔到旅行。我驚媽咪擔心，喺醫院打畀佢時淨係講我縫咗兩針，其實縫咗十幾針o架！我又唔想媽咪因為突然取消去旅行而失望，縫緊針都打電話去Book Spa畀媽咪，再叫司機接佢去。就算我由分居到離婚，都冇同媽咪提過，唔想佢為我擔心！（明日待續）