Kary開騷搵學友助陣

備受環球力捧的吳雨霏明年初再踏紅館開騷，她預告向高難度挑戰，並冀盼邀請張學友做嘉賓。

吳雨霏（Kary）昨日穿上毛毛裝露半黑Bra，為1月8日紅館《吳雨霏The Present Concert》舉行發布會，並在酒店露天平台進行氣球剪綵儀式，寓意歌唱事業飛得更高更遠。據知個唱門票優先訂購反應熱烈，她說：「知反應幾好都幾開心，今日我親自上網訂，但一樣Down機，希望可以加場。」

上次紅館騷以倒吊花式揭序幕，Kary揚言今次再有高難度演出；形象、服裝方面交由形象指導好友馬天佑負責。至於會否找舊拍檔Cookies任嘉賓？她稱有困難，因成員Serena（蒲茜兒）大肚，她心目中最想邀歌神張學友做嘉賓：「之前我做騷，學友都有送我花籃。（叫公司出馬！）係喎！我入咗環球，一次都未見過學友，希望成功啦！」

明年由頭笠到落腳

談到日前與好姊妹鄧麗欣、區文詩扮嘢到中環慶祝萬聖節，其爆谷女郎造型搶晒鏡，更有老外伸手入其爆谷盒內摷，Kary笑說：「唔係摷，係攞啫！我都有睥咗佢一下。」當晚其網球王子男友洪立熙未有同行，但兩人在街頭巧遇，她說：「嗰晚係Girls' Night，但咁蹺都撞到佢。」但Kary呻因爆谷盒太阻碇令她未有艷遇：「好難埋身。（明年着少啲布！）應該由頭笠到尾，認我唔到。」她自爆回家後發現盒內有張卡片，但她眼尾都冇望就丟了。