陳祉妤得罪小人遭抹黑

陳祉妤在模界多年，自覺幸運的是甫出道即與一班本地名模同台行騷，但其後無故被人在背後中傷攻擊，令她頓失工作，收入幾乎是零。

其實Model界競爭咁大，一定會有「Hard Time」，畀人踩住你上！行行都一樣，唔係淨係Model或者娛樂圈，所以唔覺得係辛酸。可能個天知我比較堅強，想Train Up我。我做Model嘅起步點係同琦琦、馬詩慧同翁為德三大Top Model一齊工作，可以同我三位偶像一齊行騷，已經No Regret（無悔）。諗番做咗Model咁多年，最難捱嘅時間都係早年畀人喺背後攻擊嘅日子。

被指揀Job做

自問做人好善良，本住一顆善心，就算人哋對我唔好，我都會祝福佢。我唔知做咗啲咩得罪咗人，好似無啦啦畀人「質」一腳咁，好多是非發生喺我背後而我唔知，無論點努力都冇用！當時有啲PR或者相熟嘅朋友話搵我做嘢，雖然我係空檔咗幾個月，但我都唔得閒，因為爹哋嗰時病緊。諗住Model呢行有High同Low Season，所以冇為意，但背後就有人話我唔接某啲品牌嘅Job！眾所周知，我個人係唔會因為咩品牌或者價錢而推Job。

呢啲攻擊對我有好大影響，突然之間變得百無聊賴，收入銳減，好難受！大家都係為工作，我唔係一個好Bitchy（惡毒）嘅人，唔明點解要攻擊我。我覺得自己做Model嘅路係好運之中嘅唔幸運，一入行就行大品牌嘅騷，有啲「樹大招風」嘅感覺。以前一個月30日開足28日工，嗰陣好開心，生活唔成問題又可以養家，估唔到會經歷呢段「Hard Time」。不過，我都冇同人呻過，都係自己吞咗就算。唔想亦唔知同邊個講好，有時難免要強顏歡笑。我唔會用慘或者淒涼去形容自己嘅經歷，當呢啲係一種磨練，令到我更加堅強。（明日待續）

口述：陳祉妤

筆錄：名人組