楊汀叮父擔重 回巢孭起頭家

入行6年的模特兒楊汀叮，自爆3年前曾一度退出娛樂圈，轉行當私人助理，更有機會移民美國。但適逢父親不幸癌症復發，她因捨不得老父而決心留港再闖娛樂圈，可說「孝感動天」！

有「翻版劉心悠」之稱的模特兒楊汀叮，可謂美貌與智慧並重，不僅是電腦工程的大學生，除擁有八級鋼琴及三級芭蕾舞底子外，更能歌善舞，難怪與娛樂圈結下不解緣。即使她從無想過成為藝人，卻因幫補家計輾轉成為模特兒：「讀書時因為爸爸不幸患上第三期淋巴Cancer，我要供自己讀大學，所以做咗模特兒幫補家計，但最初我好抗拒加入娛樂圈，因為我本身唔煙、唔酒、又唔識應酬，以前我好怕娛樂圈係大染缸，後來先知係自己思想太偏激！」

移民美國叫停

凡事以家人為先的汀叮，自爆曾一度毅然退出娛樂圈，轉做私人助理，卻因父親癌症復發令她再度成為模特兒：「做Model好冇安全感，收入好唔穩定，我試過足足一個月冇工開、冇收入，所以3、4年前我曾經一度放棄模特兒工作，成為台灣某位富商嘅私人助理。老闆同佢嘅屋企人好錫我，甚至叫我去美國發展，仲幫我做埋簽證搞移民！點知呢個時候爸爸癌症復發，我唔捨得離開佢，所以我放棄移民美國嘅機會，決心留喺香港娛樂圈發展！」

孝順的汀叮更坦言為了爸爸而學懂與傳媒打交道：「以前我好驚面對傳媒，但為咗癌症復發嘅爸爸，我要努力接多啲Job，既然要留喺娛樂圈發展，我就要逼自己面對傳媒，改變內向嘅性格！」她慶幸得到圈中好友鼓勵，才能堅持在模界發展：「好彩我識咗Angelababy同文詠珊呢兩位好朋友，係佢哋鼓勵我，我先可以逼自己行落去，亦係咁我喺呢3年先開始多咗人識！」但性格文靜內向的汀叮，亦坦言曾遭人抹黑：「多人話過我唔適合呢行，因我好易投放真感情，對人好真冇秘密，結果好易被人蝦！（點被人蝦？）好多時我講嘅說話會被人加鹽加醋，話我講人是非，仲屈我揀Job做！不過做朋友係一個緣分，我點都會同人真心相處，就算畀人蝦都唔緊要，最重要自己堅強同有實力！」

恨從影扮癲婆

外表嬌滴滴的汀叮，內心卻堅毅無比，早前轉簽新經理人公司的她坦言要自我增值，決心在影視圈中大展拳腳：「之前有一段時間我去咗學戲，好多謝新公司喺荷里活搵咗位導師教我方法演技！我好希望將來可以唔只集中模特兒工作，仲可以拍劇、拍電影。（最想試咩角色？）咩都想試，但最想扮癲婆，因為同現實中嘅我落差好大，哈哈！（後悔入行？）絕對冇後悔過！我只係後悔當初錯失咗好多機會，因為以前曾經有人搵我拍戲，點知我因為對自己冇信心而推咗。」

人靚聲甜的楊汀叮理應不乏追求者，但現以家人和事業為重的汀叮坦言把愛情拋諸腦後：「我依家事業都未穩定，我一定唔會投入太多喺感情，我依家係有人追，但我唔急拍拖！就算我真係拍拖，都一定要等到感情非常穩定，對方畀到好大安全感我先會公開！但我相信我將來會係一個賢妻良母，因為我識煮飯同執屋o架，哈哈！」

後記：真感情‧真眼淚

受訪期間，楊汀叮重提父親患病期間的點滴，因一時感觸不禁潸然淚下，此情此境，本想暫停訪問讓她平復心情，汀叮即堅強表示無大礙，更立刻收拾心情，繼續完成訪問。其專業精神實在令人敬佩，其真情流露，令人心酸！