陸詩韻同太子爺相睇
前港姐陸詩韻前晚出席活動時透露,因父親擔心她嫁不出,曾為她約廠家太子爺吃飯相睇,但她自言不需要富貴男友,反而要求成熟的才懂照顧她。
久未露面的陸詩韻前晚出席新斗記新店開幕活動,她透露近期忙於內地幫手打理父親的生意。問到可有趁機結識富二代,詩韻說:「冇識富二代!反而爹哋擔心我嘅感情事,佢試過約啲廠嘅太子爺同我食飯,感覺好似相睇咁。我自己唔急,係爹哋驚我嫁唔出,因為我年紀都唔細。其實我唔需要男朋友太富有,希望年紀成熟嘅,就算離過婚都唔緊要!(如果對方有小朋友呢?)小朋友係好大責任,如果我好愛佢都OK。」她又指父親不相信男人,所以他認為OK的人才會介紹給她,可惜她Say No,沒有開花結果。問到可會心急,詩韻說:「我好信風水命理,有人叫我35歲前要把握生仔機會,呢個年代有咗先結唔係大問題,我亦都有機會閃婚。」
馬德鐘冇加劇酬
同場與太太拍拖出席的馬德鐘則透露,剛從內地拍完劇返港,一年拍六套劇的他被問到是否袋十多萬元人民幣一集?他笑說:「搵兩餐夠養家啦!我好平,同喺TVB差唔多。」對於鄭嘉穎在內地拍劇受傷,馬德鐘亦自爆曾在港拍攝爆炸場面時被鐵片插頸,醫生指差點傷及大動脈!他又承認正接洽《飛虎》電影版。
陸詩韻自爆被父親「逼婚」,但皇帝女唔急太監急。
馬德鐘(左起)、艾威與陸詩韻等為新店剪綵。
馬德鐘帶埋太太「搵食」,大飽口福。