嘉穎爆眼縫10針

拳腳無眼，鄭嘉穎前日在昆山拍內地劇時慘食武師「兜錘窩面」，右眼即時爆缸，需急返港就醫。嘉穎昨日出院時還包着厚厚紗布，面對縫了十針，隨時破相之虞，他仍笑得出說：「男人有疤仲型！」卻被陪入院的樂易玲踢爆他的心情「忟憎」！

視帝鄭嘉穎愈紅愈黑仔，去年奪視帝後即在將軍澳炒車，早前又曾眼爆微絲血管，前日他於內地昆山拍攝劇集《葉問》時再度當災，眼睛一再「中招」！拍攝一場對打戲時，不慎被武師一拳打爆右眼，血流如注，眼角撕裂出現兩吋長的傷口，令劇組大為緊張，嘉穎則躺下即場接受護理。為免靚仔樣出現差池，他回過神來即心急照鏡，並決定火速返港醫治。

「對手武師仲驚過我」

前晚十一時，嘉穎從上海獨自返港，只見他右眼貼上紗布，並架上黑超遮掩傷勢，經理人見他步出機場即上前護駕。接受訪問時，嘉穎仍一臉輕鬆地說：「好小事，依家去睇醫生，希望縫兩針冇事！」他表示傷勢觸及右眼眼袋，只要好好處理，應該很快痊愈。

談及事發經過，嘉穎說：「當時有個武師做我對手，唔小心畀佢一拳打中，可能係我閃得慢，拍呢啲打戲實有，意外冇人想，好小事。個武師係個仔，佢仲驚過我，因為當時有流血！」問到會否擔心破相？他即笑說：「唔會啩？男人有疤仲型啦！」

對於急着返港醫治，嘉穎說：「原本聽日（即昨日）喺瀋陽有活動，我都未試過失場，但冇辦法，唔通戴住黑超做活動咩？都係返香港縫針先！」他表示不知道要休息多久，只希望盡快痊愈為《葉》劇埋尾：「要去睇醫生，希望休息好，可以盡快消腫，快啲拍埋佢，唔想影響進度！」隨即到港安醫院，並在無綫高層樂易玲及好友黃智賢陪同下入院。樂易玲表示嘉穎受傷時心情不好：「接到電話知道嘉穎受傷，佢當時心情有啲忟憎，可能因為隻眼好痛，又要一個人返香港。」並指今次無妄之災影響嘉穎的工作安排（見另文）。

昨午出院下周復工

留院一晚後，嘉穎昨午出院，其右眼眼袋縫針後包着厚紗布。事後他接受電話訪問時說：「縫咗十針，醫生話今次用幼線，所以縫多幾針，話出嚟疤痕冇咁大。（休息幾耐？）可能要休息到下個禮拜，等消腫之後連戲拍番！」雖然在受傷現場急急照鏡，但接受治療出院後，他似乎安心不少，還滿不在乎破相問題，他笑說：「唔擔心啦！隨遇而安，都冇度傷口有幾大，好小事！」