蒼井優劈腿夜會堤真一

日本女星蒼井優四個月前才承認搭上奀星鈴木浩介，近日卻被發現與圈中鑽石王老五堤真一頻頻撐枱腳，甚至結伴過生日，兩人雖強調是朋友關係，但網友都紛紛替鈴木擔心！

現年27歲的女星蒼井優，雖有年長10歲的圈中男友鈴木浩介，但仍跟48歲男星堤真一過從甚密，據知數年前他們由圈中人介紹認識，因同樣熱愛舞台劇而一拍即合，今年頻頻被目擊撐枱腳，單是本月已幾乎每周見面，蒼井優連8月17日生日當天也跟堤真一到意大利餐廳慶祝。

素顏的蒼井優日前被拍得夜會同樣作冷帽波鞋Look的堤真一，在居酒屋排排坐歎牛舌料理，並暢飲紅酒達4小時。預計明年初到奈良工作的堤真一，席間邀請蒼井優屆時到當地遊玩，當聽到對方笑言帶同男友鈴木同行時，他扭擰說：「咁樣我會好冇意思，你自己一個嚟啦！」飲到有幾分醉意的兩人最終各自返歸，到轉角位仍不捨地揮手說再見。

力證感情穩定

知情人士指蒼井優每逢兩杯落肚便姣到出汁，不時使出電眼和身體接觸，但堤真一已澄清二人僅屬好友關係，且不時聯同鈴木三人行食飯，蒼井優亦重申鈴木的男友身份。事實上，鈴木近日亦經常出入女友香閨，力證感情穩定。惟大批網友仍替鈴木擔心，因堤真一出名是鑽石王老五，曾跟鈴木京香和綾瀨遙等傳緋聞，而蒼井優亦是男星殺手。