陳偉霆做蠱惑仔捱打

陳偉霆於英皇電影《紮職》中瞓身做好蠱惑仔角色，但原來拍攝期間曾遇真社團人物收數，真假蠱惑仔共處一地！搏到盡的他更被打足幾粒鐘，以致口腫面腫！

陳偉霆（William）、曾國祥與徐偉棟因拍攝《紮職》而成為好友，三人日前受訪，笑談拍戲趣事，William爆了譚耀文的小秘密：「我哋拍街景嘅時候遇到真嘅社團人物收數，真假蠱惑仔同處一個地方，感覺好難形容，而演緊大佬嘅譚公（譚耀文）即刻抽離角色，收番啲大佬氣勢，但之後要一段時間先可以代入番。」

William為演好蠱惑仔角色瞓身搏盡，事前操肌、搵江湖人物傾偈攞資料，拍攝時又叫對手出盡力打，首日開工已被打足幾粒鐘，下下到肉，半邊面腫起，瘀青一片片，導演還一度以為是化妝效果，叫他減妝，令他哭笑不得。問到女友蔡卓妍（阿Sa）會否心痛？William Man爆地說：「男人做嘢，女人唔使理，邊個嘅慰問都唔會影響我嘅工作。」William戲中有一場跟詩雅的激吻戲，他揚言不用跟女友備案。

互讚有義氣

《紮》片中除了有不少劈友場面外，還有講述兄弟情，William及曾國祥互讚對方夠義氣，曾國祥笑說：「之前我做導演拍《戀人絮語》，William做嘢捱咗四十八個鐘頭冇瞓再嚟幫我開工，都冇講過一句畀我聽，好有義氣。」