Bosco打救Niki 師奶鼓掌

黃宗澤（Bosco）似乎已走出失戀陰霾，前晚與周麗淇（Niki）拍新劇，更出動價值128萬元的「新老婆」平治S350房車晒命，吸引不少街坊粉絲圍觀！

與胡杏兒分手後，黃宗澤連月來埋首工作，似乎已收拾心情，前晚拍攝新劇《好心作怪》，他帶同「新老婆」平治S350房車開工，只見他將逾百萬靚車在旺角街頭周街泊，全不擔心愛車「危險」。

現場所見，Bosco與Niki吸引不少途人圍觀，劇情講述Bosco暗中保護意外失明的Niki，見她被爛仔圍堵，即起飛腳英雄救美，功架十足，一批師奶Fans睇到拍爛手掌。

問到與Niki合作有否過電，Bosco笑說：「拍嘢啫！入面同佢係一對，有咀戲，不過唔係太激！」談到舊愛杏兒與徐子珊爭視后，問到心水如何？Bosco即力撐舊愛說：「杏兒啦！佢好大機會，《怒火街頭2》做得好好，如果佢攞會恭喜佢！」

扮失明富挑戰

Niki則表示首次演失明角色，感覺很特別：「呢套劇好多嘢玩，挑戰到演技。」談到與Bosco的咀戲，她說：「總之合作好愉快，夾到囉！大家係Friend底，唔尷尬！」