DaDa儲千萬才安心

圈中20出頭的富婆沒幾個，o靚模出身的陳靜（DaDa）是其中一人，只有22歲的她已擁有兩個物業，難免令人懷疑錢從何來。對於被照顧的傳聞，她直斥荒謬，強調買樓的錢都是有血有汗，密密吸金賺來的！

細細個，媽咪已經叫我買樓投資，我覺得買樓係一種好好嘅投資，之前亦試過賣樓賺咗少少。我買第一層樓應該係18歲，同家姐夾份，媽咪都有幫吓手。當時買86萬嘅唐樓，係靠做Model賺番嚟嘅積蓄，做Job每個月最少有5位數，有時仲會有6位數收入。我16歲入行，儲咗兩年錢先買，好幸運之後層樓升到過百萬，賺咗唔少。

其實我好細個已經有筆錢，係媽咪幫我儲落，加上佢幫我投資，20萬其實唔難儲到，唔多唔少令我比其他人容易買樓！依家住緊嘅樓係上年年頭買，記得當時買入價係357萬，7成按揭，只係拎120萬出嚟，當然媽咪亦有幫手，當係21歲生日禮物。到今年5月再買樓花，都係當投資。

傳被照顧感荒謬

好多人誤會點解我入行兩年半已經有咁多錢，但如果真係畀人照顧，我已經搬咗去住半山啦！真係好荒謬！其實我只係住私人屋苑，唔係千萬豪宅。我一直都唔擔心畀人咁睇，我向來有做嘢、有收入，加上唔大使，儲到錢買樓都唔出奇，係我血汗錢！

我要有錢傍身先有安全感，戶口要過7位數先安心，所以買完第二層樓嗰陣，戶口得番5位數字，覺得好艱難！呢兩年好感恩，雖然唔係大富大貴，但做小投資都唔錯，我喺樓價高嘅時候買樓，覺得仲會升，如果依家計埋物業，身家當然過千萬，但積蓄梗係未夠啦！希望等多兩年可以儲到。（全文完）

後記：同學叫我「靜姐」

大部分小朋友都有問父母拿零用錢，但相信沒有人比陳靜的多，故不少男同學都稱呼她為「靜姐」，更會服侍她買零食，趁機分杯羹！她說：「讀書時，我每日都有100蚊零用錢，到小息就會有男同學幫我買嘢食，個個都叫我『靜姐』，所以我會拎40蚊出嚟同大家一齊分享。」人仔細細已如此富有，十足女版「花倫同學」呢！

口述：陳靜

筆錄：專案組