鄭嘉穎捱拳爆眼角

鄭嘉穎昨日在上海昆山為電視劇《葉問》拍攝連場打戲時，因閃避不及，慘遭對手一拳打爆右眼角，傷口足有兩吋長，情況嚴重，嘉穎仍堅持完成戲份，才急返港就醫。

鄭嘉穎近期與周秀娜在上海昆山拍攝電視劇《葉問》，雖然千萬酬勞袋袋平安，可惜搞到周身傷，昨日他拍攝一共五場打戲時，不幸被對手嚴重打傷右眼角，情況令人憂心！據知嘉穎於凌晨五時半已開始為《葉》劇開工，打足大半天，昨日嘉穎在擂台上跟身材高大的對手比武，但對方猛力出拳時，嘉穎一時閃避不及，硬食一拳，右眼眼角重創，即時面露痛楚及標眼水，工作人員都上前為他檢查傷勢，但嘉穎堅持只簡單冰敷，忍痛繼續拍攝，拍完後他才急急趕往機場搭飛機返港求醫。

工作人員大讚

據悉，嘉穎今次意外受傷，恐有破相之虞，其右眼角皮膚撕裂，更留下約有兩吋長傷口！有工作人員在微博大讚嘉穎專業，指他堅持完成戲份，更將嘉穎出事後仍照打的相片上載微博，相中見嘉穎仍落力與對手對打。亦有其他工作人員爆料：「打咗成日，打到Ip Man（葉問）都意外爆缸，本來一個可以打十個，依家搞到唔知幾時先可以打埋最後嗰個。」

樂易玲勁擔心

記者致電樂易玲問嘉穎傷勢，她很擔心地說：「嘉穎畀人打爆眼角，因為冇助手喺嘉穎身邊，嘉穎打返嚟問點算，公司安排佢返香港，安排好機票同醫院。（擔唔擔心會破相？）未知情況，不過好彩佢係男人會好啲！」其實嘉穎今次飾演一代宗師，早前已試過兩次嚴重受傷，本身沒有功夫底子的他共有二百多場打戲，一次是右眼微絲血管撕裂，一次是扭傷頸，而原本今日到瀋陽出席國際品牌活動的他，因傷眼而被迫缺席。

此外，專業動作導演錢嘉樂表示，基本上多動作場面的電影，演員拍攝前都需要較多時間訓練，楊紫瓊及周杰倫拍攝《皇家師姐》及《逆戰》前都經過長時間訓練，才不會輕易受傷，嘉樂又指嘉穎雖體能不俗，惟親身上陣難免易受傷。