陳靜衣櫃藏仔：媽咪打我一巴

陳靜（DaDa）自小父母離異，與父親關係一直疏離的她，直至月前才如願與一家四口同枱吃飯，卻因父親當正母親仇人，最終拍枱收場！與母相依為命的她，卻曾因「金屋藏仔」觸怒母親，換來一巴掌！

以前父母成日鬧交仲掟櫈，細細個我好驚，攬住家姐喺房唔敢出廳，我六、七歲時佢哋就離婚，有怨過屋企人，點解其他人可以成家人一齊去玩好開心，我就冇一個完整嘅家庭？家姐咁早結婚都係因為呢個原因。

父母離婚後法庭判我跟媽咪，但當時佢冇經濟能力，所以我同爸爸住住先，當時唔係好開心，因為爸爸唔畀我見媽咪，佢嗰邊屋企人成日講媽咪壞話，令我唔係咁鍾意爸爸！而且佢哋係錫家姐多啲，覺得我係「媽咪嗰邊」，就算爸爸點樣想對我好，隔咗咁多年，我心裏依然有條刺。

17歲溫仔 屋企睇碟

兩年後媽咪接番我，真係好開心，佢對我好好，咩都盡量滿足我，我哋感情特別好，係有一次我呃佢，佢先打我。記得17歲我自己一個人住，媽咪間中拎湯畀我，嗰陣我同初戀男友喺屋企睇碟，聽到有鎖匙聲知媽咪返嚟，當時好驚即刻入房，仲將男友收埋入衣櫃，點知媽咪入房幫我執衫發現佢對腳，但冇即場踢爆，過咗幾日先同我講，我死口唔認仲駁嘴，叫媽咪唔好屈我，然後就行入房，呢個時候佢打咗我一巴，當時大家都喊，其實媽咪只係擔心我畀人呃，我覺得好對佢唔住，但呢件事後令我哋感情變得更好。

家庭飯局 拍枱走人

同爸爸就好少聯絡，關係唔係咁好，呢幾年想修補，想一家人同枱食飯，因為父母離婚後就冇試過。月前終於有機會，但估唔到爸爸咁多年後依然當媽咪係仇人，嗰次嬲到拍枱走，佢係好大男人，想我打電話畀佢，但我冇，依家大家處於冷戰狀態。（明日待續）

口述︰陳靜　

筆錄︰專案組