碩之玩衝浪周身瘀

趙碩之上月中與吳雨霏往深圳的東部華僑城,拍攝內地遊戲節目。性格活潑好動的碩之也藉着此趟旅程,寓工作於娛樂,一連三日瞓身玩個不停!眼見室內小型人造衝浪池相當刺激,首次接觸滑水的碩之,爭取時間衝個夠,她興奮地說:「啲水力好勁,個浪第一次打過嚟,我個腦都一片空白,仲撞到成身瘀晒。我係女仔又啱啱學,所以要趴喺度玩,但見教練好似孫悟空企喺舊雲上面滑,我都好想學佢咁,好好玩!」

翌日,碩之拉大隊到茵特拉根茶溪谷落田採茶及炒茶,可惜一直未獲通知行程,令她着錯高跟鞋:「由於塊田喺斜坡嚟,我踩住對高跟鞋都好驚碌落山,所以都要扶實!但炒茶嗰陣好香,我哋都忍唔住係咁索!」其後踏水上單車時,好勝的她更脫鞋落水玩。自言考車牌一Take過的碩之,又自爆被嘲只懂一味衝、毫無方向感,但她解釋考牌大半年來都沒開過車。

碩之首次玩衝浪,大呼過癮!

碩之(右)踏水上單車時,被嘲冇方向感。